بلوچ یکجھتی کمیٹی ءِ سروک ڈاکٹر سبیه بلوچ ءَ ماں وتی شنگ کرتگیں درشانے ءَ گوشتگ که ریاست گوں نہ ترسی ءَ بلوچ ءِ چکچینی ءَ برجاه دارگ اِنت ، آ روچ ءِ رژنائی ءُ شپ ءِ تھاری ءَ مئے ورناھاں زوربیگواه کنگ اِنت. انوں آ کسانیں زھگ ءُ جنیناں ھم زوربیگواہ کنگ ءَ اِنت۔
آئی ءَ گوشتگ که اِے زوراکیانی بُنکی سوب مئے بے تواری اِنت ، دژمن وھدے که گند ایت ما تُرسگ ءَ اِیں گڑا تَمرد بیت ءُ وتی زوراکیاں گیش کنت. ما بائد اِنت که اے راستی ءَ به منّ اِیں که په مئے کمک ءَ دگه هچ کس نئیت ، په وتی آیوکیں پدریچ ءُ مردمانی پھازگ ءَ ما وت پاد بیائیں ءُ توار چست به کن اِیں۔
ڈاکٹر سبیه بلوچ ءَ گوں بلوچ راج ءَ لوٹ کرتگ ءُ گوشتگ که وتی آزیزانی زوربیگواھی ءِ بابت ءَ بے توار مه بنت ، دیم ءَ بیا اَنت ءُ اِے زوراکیانی ءَ دیم ءَ به اوشت اَنت ، من گوں سرجمیں بلوچ ءَ لوٹ کن آں که آ گوں سانمندیں کھولاں ھمراه به بنت ءُ آیاں تھنا یل مه کن اَنت۔
آئی ءَ گوشتگ که بسیمگ ءَ په ماه جبین بلوچ ءِ یل کنگ ءَ زهرشانی روانکے کشگ بیت ، من چه بسیمگ ءِ مردم ءُ بلوچ راج ءَ لوٹ آں که اِے روانک ءَ بھر به زور اَنت ءُ گوں زوربیگواھیں مردمانی کھولاں ھوار به بنت۔
ڈاکٹر سبیه بلوچ ءَ وتی درشان ءِ گڈی ءَ گوشتگ که اِے زوراکی بس یک ءُ دو گس ءِ جیڑه نه اِنت بلکیں ما کل چه ایشی ءَ سانمند ایں، اگاں بے توار به بئیں مئے اے بے تواری په مئے آیوکیں پدریچ ءَ یک داگے جوڑ بیت۔
