بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ اسپیشل ٹیکٹیکل آپریشنز اسکواڈ ( ایس ٹی او ایس ) ءَ دوشی شال ءَ کاروائی یے ءِ میان ءَ زورگریں پاکستانی پوج ءِ نزیکیں کارمند بابل مھمد ھسنی کشتگ ، اے کاروائی بی ایل اے ءِ انٹیلی جنس ونگ ” زراب ” ءِ چیریں ھالانی بنیاد ءَ گوں سوبمندی ءَ کنگ بیتگ۔
آئی ءَ گوشتگ که بی ایل اے ءِ سرمچاراں شال ءَ بروری دگ ، اسٹاپ ءَ پاکستانی پوج ءِ چریک بابل مھمد ھسنی ء زبر مھمد ھسنی ءِ گاڑی گوں چیر کرتگیں شورھاں نشانگ کرتگ که ایشی ءِ آسر ءَ آ جاھی مرتگ ءُ آئی ءِ سنگت نبیل ء مھمد امین جاه منند کلات سکا ٹپی بیتگ ، اُرش ءَ آئی ءِ گاڑی سرجم ءَ تباه بیتگ.
جارکش ءَ گوشتگ که بابل ء زبر مھمد ھسنی جاه منند کلات ، زورگریں پاکستانی پوج ءُ چیریں ادارھانی نزیکیں کارمندے بیتگ که گوں کشنده ٹولی ءِ کارمند زکریا مھمد ھسنی تچک ءَ هوار بیتگ ، بابل مھمد ھسنی کلات ءَ یک سلاه بندیں ٹولی یے ءِ سروکی ءَ کنگ ءَ بیتگ که اِے ٹولی کلات ءِ شھر ءُ کش ءُ کراں کار ءَ بیتگ.
آئی ءَ گوشتگ که بابل مھمد ھسنی ءَ پاکستانی پوج ءِ چیردستی ءَ یک آزارجاھے برجاه داشتگ ءُ ورنا چه زوربیگواه کنگ ءَ پد برتگ ءُ آزار داتگ اَنت ، اِے ٹولی ءَ بازیں دمگاں سنگر جتگ ءُ سلاه بندیں دروشم ءَ تر ءُ گرد کرتگ ، کلات ءِ ھند گرّاپ ءَ پوجی چوکیانی برجاه دارگ ءَ ھم اے ٹولی ھوار بیتگ ، ھمے وڑ ءَ اِے ٹولی سرکین ءُ مزاپاتی ءِ دمگاں بابل مھمد ھسنی ءِ سروکی ءَ لس مردمانی سر ءَ زوراکی کنگ ءَ تچک ءَ هوار بیتگ ، چه ایشی ءَ اَبید منگچر ءِ ھند کوھک ءَ ھم اِے ٹولی بازیں ورناھانی زوربیگواھی ءَ هوار بیتگ۔
جیھند بلوچ ءَ درشان ءِ گڈی ءَ گوشتگ که بابل مھمد ھسنی ءِ ٹولی ءَ ھواریں آدگه مردم سرجم ءَ پجارگ بیتگ اَنت ، بی ایل اے ءِ انٹیلی جنس ونگ ” زراب ” آیاں یکشل ءَ رندگیری کنگ اِنت ، اے درسیں مردم تچک ءَ یا چه دور ءَ گوں گوں بابل مھمد ھسنی ءَ ھوار اَنت ، بی ایل اے آیاں گڈی موہ ءَ دنت که بلوچ راجی زرمبشت ءِ دیم ءَ وتی سلاھاں چگل به دے اَنت ، اگاں نه آیانی آسر ھم بابل مھمد ھسنی ءِ پیم ءَ کنگ بیت۔
