بلوچ نیشنل موومنٹ ( بی این ایم ) ءِ بنجاھی کارگشاد دل مراد بلوچ ءَ وتی شنگ کرتگیں درشانے ءَ گوشتگ کہ مرچی بلوچستان ءِ یک مزن پگریں، لبزانکی ءُ آجوئی لوٹوکیں رھشونے ءِ شھیدی ءِ روچ اِنت، پروپیسر سبا دشتیاری ھما مزن ھستی اِنت کہ چہ آئی مزنی ءُ کربانیاں بلوچ ءِ زھگ زھگ آئی سر ءَ پھر بند ایت۔ پروپیسر سبا دشتیاری ءِ اسل نام گلام ھسین بوتگ، بلے زانشتی، لبزانکی ءُ سْیاسی پڑ ءَ آ چہ سبا دشتیاری ءِ نام ءَ نامدار بوتگ۔ سبا دشتیاری بلوچستان یونیورسٹی ءَ اسلامیات ءِ پروپیسر بیت، بلے آ چہ نوکری یا سرکاری اگدہ ءُ زمہ واریاں گیش لیکھی، زانشتی ءُ مزن کردیں مردمے اَت۔ سبا ءِ مارشت چوناھیا ھم دین یا ربیتی جاھے ءَ بندوک نہ اِنت۔ یک انچیں وھدے بیت کہ آ تھنا لبزانکی پڑ ءَ سرگرم بیت، بلے گوں وھد ءِ ھساب ءَ آئی ءَ گوں بلوچ راجی زرمبشت ءَ مزنیں ھمگرنچی یے بیت ءُ بلوچ راج ءِ سْیاسی ءُ کردی پڑ ءَ رھشونی ءِ پرز ءِ پیلو کنگ ءَ بندات کنت۔
آئی ءَ گوشتگ کہ سبا دشتیاری ءَ بلوچ ورنایان ءَ نگدی زانشت، پٹ ءُ پول ءُ کردی گامگیج ءُ راجی بودناکی ودی کنگ ءِ بے کساس جھد کرتگ۔ منی ھیال ءَ اے آئی اِلم ءُ لبزانکی جھد ءُ جپا، پگر ءُ سْیاست ءِ برورد اِنت کہ ”زانت ءُ زانگ ءَ ابید آجوئی گرگ نہ بیت، ءُ آجوئی بے زانشت ءَ بے سیت اِنت۔“آئی ءَ لبزانک، زبان، گوستانک ءُ سْیاست ءِ سر ءَ باز کار کرتگ۔ آئی نبشتانک، رجانک، گپ ءُ گوشتانک پہ بلوچ راجی گوستانک ءَ بے مٹیں مڈی اَنت۔
دل مراد بلوچ ءَ گوشتگ کہ گڈی ءَ اے بد بھتیں روچ اتکگ کہ پاکستان ءَ بلوچ ءِ زانشتی چیدگ ءِ ڈیرینگ، بلوچ ءِ لیکھی رژن ءِ کُشگ ءِ پیسلہ کرتگ۔ مرچی ھما روچ اِنت شال ءِ دگانی سر ءَ پاکستان ءَ شھید کرتگ، بلے سبا گوں روچ ءِ بْرانزاں، ماہ ءِ ماھکانی ءَ، سرمچارانی ھکّل، ارمانی ئیں دلانی دْریکّگ، تلو ءِ اوگاماں گوں پہ جاک ءُ جلّل گْوشگ ءَ اِنت، چی ءَ کہ سبا ءِ جار بوتگ ” من بے توار نہ باں“
