شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5845 روچ سرجم بوتگ۔ شمبے ءِ روچ ءَ جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ سروکاں گوں مردماں تران کرتگ ءُ گوشتگ کہ چہ اے دراجکشیں زھرشانی ءَ ابید بلوچ راج چہ بنیادی ھکاں زبھر اِنت ءُ بلوچستان ءَ زوریں بیگواھیانی درچ برجاہ اِنت۔
چہ گل ءِ نیمگ ءَ گوشگ بوتگ کہ ماہ جبین واشک ءِ ھند بیسیمگ ءِ جاہ منند اِنت۔ آ بلوچستان زانشتجاہ ءِ لائبریری سائنس ءِ نودربر اِنت۔ ماہ جبین ءَ پولیس ءُ سی ٹی ڈی ءَ چہ شال ءَ دزگیری ءَ پد بیگواہ کرتگ۔
آئی ءَ گوشتگ کہ چہ بلوچستان ءَ مردم درکانودی آوار جنگ ءُ پد ءَ کشگ بنت آیانی کھول ھم نشانگ کنگ بنت اے انسانی ھکانی گنتریں لگتمالی اِنت۔ بلوچستان ءَ زوریں بیگواھی دودے جوڑ بوتگ۔
وی بی ایم پی ءَ گوں سرکار ءَ لوٹ کرتگ ءُ گوشتگ کہ ماہ جبین بلوچ، آئی برات یونس ءُ آدگہ مردم زوت یل کنگ بہ بنت۔
آئی ءَ شال ءَ زھرشانی کنگ ءِ جار جتگ ءُ گوشتگ کہ آئید ءِ روچ ءَ زاکر مجید ءِ زوریں بیگواھی ءِ شانزدہ سال سرجم بوگ ءَ زھرشانی کنگ بیت۔
