بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اےءِ سرمچاراں مرچی بیگاہ ءَ سوراب شھر سرجم ءَ دستیگ کرتگ ءُ دژمنیں ریاست ءِ درسیں لشکری، انتزامیہ ءُ مالی جاہ تاوان داتگ اَنت۔ اے کاروائی داں سے ادار ءَ گیش برجاہ بیتگ،اے میان ءَ سرمچاراں شھر ءِ درسیں جاہ ءُ شھدگاں سنگر گپتگ ءُ نشتگ اَنت۔ سرمچاراں لیویز تانہ، پولیس تانہ، ڈی سی کارگس، آرامجاہ ءُ بینک دستیگ کرتگ اَنت ءُ دژمن ءِ تونگری پروش داتگ۔
آئی ءَ گوشتگ کہ اے کاروائیانی میان ءَ سرمچاراں لیویز ءُ پولیس کارمند دزگیر کرتگ اَنت چہ تانہ ءُ ڈی سی کارگس ءِ پھازداریں سے چوکیانی 30 سی تیری، آدگہ سلاہ ءُ جنگی ساز ءُ سامان پل اتگ اَنت۔ اے کارمند چہ آیانی بلوچ پجار ءِ بنیاد ءَ بکشگ ءُ رند ءَ یل کنگ بیتگ اَنت۔ دژمنیں لشکر ءِ سے گاڑی، ریاست ءِ گودام، آرامجاہ ءُ سے بینک سرمچاراں مانداشتگ۔ دو گاڑی زرتگ۔
جارکش ءَ گوشتگ کہ دمگدار ءِ کارگس ءِ دستیگ کنگ ءِ میان ءَ کمک دمگدار ھدایت اللہ بلیدی ءَ ارش کنگ ءِ جھد کرتگ، سرمچاراں جانی تاوان دیگ ءَ ابید گپتگ ءُ یک کوٹی یے ءِ تہ ءَ بند کرتگ۔چہ بدبھتی ءَ کوٹی ءِ تہ ءَ دم ءِ بند بوگ ءِ سوب ءَ مرتگ، اے بس ویلے بیتگ۔
آئی ءَ دیمتر ءَ گوشتگ کہ بی ایل اے ءِ سرمچاراں سوراب شھر ءِ سرجم ءَ دستیگ کنگ ءِ ھواری ءَ شال کراچی شھدگ، سوراب گدر شھدگ ءِ سر ءَ سنگر گپتگ ءُ پہ ریاستی تر ءُ گرد ءِ بابت ءَ پٹ ءُ پول ترند کرتگ۔
جیھند بلوچ ءَ درشان ءِ گڈی ءَ گوشتگ کہ اے کاروائی ھمے ارادہ ءِ درچ اَنت کہ ایشی مول زورگریں ریاست ءِ ھمک ادارہ، ھمک چیدگ ءُ ھمک توان نیست ءُ نابود کنگ بہ بیت۔ ما یکبرے پد ءَ گوش ایں کہ مئے جنگ داں بلوچستان ءِ آجوئی ءَ برجاہ بیت۔
