بلوچ نیشنل موومنٹ ( بی این ایم ) ءِ انسانی ھکانی تک پانک ءِ نیمگ ءَ 29 مئی 2025 ءَ یک آن لائن دیوانے برجم دارگ بیتگ۔ دیوان ءِ جارچینی ءِ زمہ واری بی این ایم ءِ بنجاھی پتر ءِ باسک ءُ پانک ءِ باسک ریاز بلوچ ءَ گوں بیتگ ءُ کمکار پانک ءِ کوآرڈینیٹر ھاتم بلوچ بیتگ۔
پانک ءِ سروک ڈاکٹر نازر نور ءَ تران کرتگ ءُ پریس کانپریس ءِ رد ءَ بلوچستان ءَ برجاھیں ریاستی زوراکی، درکانودی کوش، زوریں بیگواھی ءُ انسانی ھکانی پادمالی پیش کرتگ اَنت۔
ڈاکٹر نازر نور ءَ تران کرتگ ءُ گوشتگ کہ گوستگیں دہ روچانی میان ءَ چہ بلوچستان ءِ جتائیں جاھاں ھوار کراچی ءَ ھم باز بلوچ زور بیگواہ کنگ بیتگ۔ آیانی تہ ءَ باز مردمانی لاش رند ءَ چگل دیگ بیتگ۔ اے درسیں ویل ادارہ ءِ کِر ءَ نبشتہ اَنت۔
ڈاکٹر نازر نور ءَ مئی ءَ ریاستی پوج ءِ درسیں زوراکی یک پہ یک ءَ گوشتگ اَنت کہ آ پانک ءِ کِر ءَ یاداشت کرتگ اَنت۔
پانک ءِ پریس کانپریس ءَ گوں رسانکدر، انسانی ھکانی ادارہ، سول سوسائٹی ءُ گوں میان استمان ءَ لوٹ کنگ بیتگ کہ آ بلوچستان ءَ برجاھیں انسانی ھکانی بگیریانی سر ءَ گوں دلجمی ءَ دلگوش بہ دے اَنت ءُ پہ سانمندیں مردمانی پھریزگ ءَ گامگیج بزور اَنت۔
