آواران: چہ جاھو ءَ زورگریں پاکستانی پوج ءِ دست ءَبیگواہ کنگ بیتگیں ورنا درمان بلوچ ءِ لاش چگل دیگ بیتگ۔
کشگ بیتگیں درمان بلوچ ء رھیم بکش جاھو ءِ میتگ چھبی ءِ جاہ منند اِنت کہ زی بیگاہ ءَ چہ کوھڑو پاکستانی پوج ءِ بنجل ءَ پیشی ءَ روگ ءَ پد درکپتگ ءُ دیم پہ وتی گس ءِ نیمگ ءَ روگ ءَ بوتگ کہ چہ بنجل ءِ نزیک ءَ چیریں ادارھانی کارمنداں آوار جتگ ءُ برتگ۔ مرچی سھب ءَ آئی لاش چہ کوھڑو ءَ ڈگارانی سر ءَ دست کپتگ۔
درمان بلوچ ءِ زوریں بیگواھی ھال زی چہ زرمبش ءِ نیمگ ءَ ھم شنگ کنگ بیتگ اَت۔
چوش کہ ھپتگے پیش پاکستانی لشکر ءَ چہ جاھو ٹوبوکڈ ءَ ھنیپ بلوچ ء ازیز نامیں ورنایے آوار جتگ اَت ءُ پد ءَ ھما روچ ءَ آئی لاش چگل دیگ بیتگ ات۔ یکیں ھپتگ ءَ اے دومی ورنا اِنت کہ پاکستانی پوج ءِ دست ءَ کشگ بیتگ۔
تھنا چہ آواران دمگ ءَ گوستگیں دہ روچانی میان ءَ نوہ مردم پاکستانی پوج ءَ کشتگ کہ آیانی تہ ءَ یک جنینے ھوار اِنت ءُ یک جنینے ٹپی بیتگ۔
