بلوچ وومن پورم ءِ سروک ڈاکٹر شلی بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ ماہ جبین بلوچ بلوچستان زانشتجاہ ءَ لائبریری سائنس ءِ نودربر ے کہ دوشی چہ سول نرسنگ ہاسٹل ءَ ریاستی ادارھانی مردماں زوربیگواہ کرتگ ءُ آئی برات یونس بلوچ بیگواہ اِنت۔
آئی ءَ گوشتگ بلوچ مردیناں ھوار جنینانی بیگواہ کنگ ھم پہ ما نوکیں گپے نہ اِنت، زرینہ مری ، ھنیپہ بگٹی، ماھل بلوچ ، نوراتون بلوچ،ھبیبہ بلوچ ءُ مروچی ماہ جبین بلوچ ءُ دگہ بازیں جنین کہ آ ریاستی آزاراں سگگ ءَ اَنت ءُ بازیں جنین شھید کنگ بیتگ اَنت چوکہ زامر بگٹی،بانک کریمہ، ملکناز بلوچ ،کلسوم بلوچ ،ھوری بلوچ ءُ دگہ بازیں جنین اَنت۔
ڈاکٹر شلی بلوچ ءَ گوشتگ کہ ریاست ھچ مرد ءُ جنین ءِ بُنیاد ءَ ترا نہ جنت ءُ زندانی نہ کنت بلکیں آ ترا بلوچ کنت ءُ جنت، ھما مردم کہ گوں بلوچ جھد ءَ بندوک اِنت زالبولے بوت یا کہ مردینے آئی ءَ ریاست یکیں نز ءَ چار ایت۔ زی بہ گندئے جنین ننگ بوتگ ءُ لوگ ءَ نشتگ، بلے مرچی جنین گھگیری ءِ چیدگ جوڑ بوتگ ءُ ریاست ءِ ھمک گپ رد کُتگ کہ جنین نزور اِنت ننگ اِنت آ لوگ ءَ بہ نندیت۔ ما ھمک زرمبشت ونتگ کہ وھدئے جنین جھد ءَ ھوار بوتگ اَنت گڑا سوب پہ آ راج ءَ نزیک بیتگ، ءُ جنین ءِ تہ ءَ زانت آیگ ءُ جھد ءَ بھر بوگ پہ استان ءَ یک سر درد ے پمیشکا بلوچ جنینانی جھد ءِ تہ ءَ بھر بوگ پہ ریاست ءَ سردردے آ نہ لوٹ ایت کہ آبادی ءِ نیم ءِ تہ ءَ زانت بئیت استان جنینانی چہ جھد ءَ دیر دارگ ءَ وڑ وڑیں پندل سازگ ءَ ِاِنت، مرچی بلوچ جنینانی زانشت پہ ریاست ءَ یک سر دردے پمیشکا ڈاکٹرماہ رنگ ،گلزادی ءُ بیبو زندانی اَنت ءُ مرچی ماہ جبین بلوچ ھم۔
آئی ءَ گوشتگ کہ چہ دو ہزار نو ءَ داں دو ہزار چاردہ ءَزوریں بیگواھی ءُ جنگ ءُ چگل دیگ ءِ شوندات ءِ تہ ءَ گیش ترندی آرگ بیت ءُ مزنیں بندشے بلوچ ءِ زرمبشت ءِ سر ءَ لگگ ءَ پد یک ترس ءُ بیم ءِ چاگردے ءِ ودی بیت ءُمزنیں بے تواری یے گندگ ءَ کئیت، پدءَ انچیں دورے کئیت مردم گپ جنگ ءُ بلوچی کتاب ءِ دست ءَکنگءَ ترس اِت اَنت ، بلئے ملکناز ، ھیات ءُ بانک ءِ نمیرانی ءَ پد مزنیں زرمبشتے چست بوت آ ترس کہ مھلوک ءِ مجگ ءِ تہ ءَ مان کنگ بوت،آ ترس مھلوک ءَ پروش دات ءُ پدا زوراکی ءِ بگیر ءَ یکمشت بیت اَنت ۔ چوں نہ اِنت کہ بلوچ مرچی جنگ ءُ کُشگ بوگ ءَ نہ اِنت ، بلوچ ءِ چُکچینی یکشل ءَ برجاہ اِنت بس جنگ ءِ دروشم مٹ کنگ بیتگ،بیگواہ ،جنگ ءُ ژانگولیں جون ءِ دور دیگ، دروگیں میڑ ءِ نام ءَ جنگ، نشانگ کنگ ، مُچانکی کبر ءِ دست کپگ اے انگتءَ برجاہ اَنت۔
ڈاکٹر شلی بلوچ ءَ گوشتگ کہ ریاست جیڑ ایت بلکیں چہ بلوچ اوبادگانی بیگواہ ءُ ژانگولیں جونانی دور دیگ ءَ بلوچ پدا ترس آماچ بیت ءُ زوراکی ءِ بگیری گُنگ بیت،بلوچ ءَ 2009 ءَ بہ گر دانکہ 2014 ءَ ھمک روچ، بلوچ ورنایانی بیگوائی ، تیرسُپتگیں جون ، ڈریل کُتگیں ءُ پن مشین جنوکیں جون دیستگ اَنت بازینے دست پچگ بوتگ اَنت ءُ بازینے جان ءِ آز اکشگ بیتگ اَنت۔ بلوچ ءَ ھرچی گوں وتی چماں دیستگ، وھدیکہ آ تی زوراکی ءِ بگیری ءَ در کئیت گڑا آ وتی ھر چیز ءَ ببا دنت ءُ چہ آئی دل ءَ ترس ءَ گیش آئی چماں تو پہ وت کینگ گند ئے ۔
