آواران: مالار مچی ءَ پاکستانی پوج ءِ دست ءَ ناھک ءَ کشگ بیتگیں نئیم بلوچ ء سنجر ءُ ھوری ء کاسم ءِ کھول ءَ وتی شنگ کرتگیں درشان ءَ گوشتگ کہ پاکستانی پوج ءِ نیمگ ءَ گوستگیں دہ سال ءَ گیش اِنت مئے کھول زوراکیانی آماچ اِنت۔ دو روچ پیش مالار مچی ءَ پاکستانی پوج ءَ مئے گس ءَ بیڑ برگ ءُ نئیم ءُ ھوری ءِ کوش ءُ دادی بلوچ ءِ ٹپی بوگ ءَ ابید مئے کھول مدام زوراکیانی آماچ بیتگ۔
آئی ءَ گوشتگ کہ بی بی ھوری ءَ ھوار مئے سے جنین چہ پاکستانی پوچ ءِ تیرگواریاں شھید بیتگ۔ 18 جولائی 2015 ءَ آواران وھلی ءَ پاکستانی پوج ءِ زوراکی ءَ سبور بلوچ ء رھمت، مھمد نور ء اسھاک، واھد ء موسا، نور ملک ء ازیز ءُ گوھر ء ابراھیم کُشگ ءُ سول جان ء میار آوار جنگ ءُ بیگواہ کنگ بوتگ۔ گوستگیں روچ ءَ پوج ءِ تیرگواری ءَ ٹپی بوتگیں دادی بلوچ ءِ برات اشرپ بلوچ پاکستانی پوج ءَ 29 مارچ 2025 ءَ آوار جتگ ءُ بیگواہ کرتگ انگت بیگواہ اِنت۔
آئی ءَ گوشتگ کہ چہ مالار مچی ءَ ریاستی زوراکی ءَ پد دادی بلوچ گوں ٹپی ئیں جاوراں انگت ءَ نادراہ اِنت ءُ آئی الاج بوگ ءَ اِنت۔ اے زوراکی ءِ بگیری ءَ مئے کھول ءَ وھدے آواران بازار ءَ زھرشانی کرتگ گڑا دمگی انتزامیہ ءَ ھمے دلجمی داتگ شمئے کھول ءَ گوں انساپ کنگ بیت ءُ ریاستی ادارہ نوں شمئے کھول ءِ گون ءَ زوراکی نہ کنت۔ چہ انتزامیہ ءِ دلجمی دیگ ءَ پد ھم پرندوشی، دوشی ءُ مرچی روچ ءَ پاکستانی پوج ءَ سے رند ءَ مئے گس ءَ بیڑ برتگ ءُ زوراکی کرتگ۔
آئی ءَ گوشتگ کہ ما چہ بلوچ راج ءُ انسانی ھکانی ادارھاں لوٹ کن ایں کہ مئے سر ءَ بیوکیں ریاستی زوراکیانی بگیری ءَ توار چست بہ کن اِت۔ چہ پاکستانی پوج ءِ نیمگ ءَ انچو زوراکی کنگ ءَ پد ھم مارا انچوش گمان بوگ ءَ اِنت کہ پاکستانی پوج مئے مردماں ناھک ءَ کش ایت ءُ زوربیگواہ کنت۔
