بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں شال ، زامران ءُ کولواه ءَ پنچ جتائیں ارشاں زورگریں پوج ءُ آئی ءِ چریک نشانگ کرتگ اَنت ، اِے کاروائیاں چیرکرتگیں بمب ، تچک ءَ سلاه بندیں اُرش ءُ دزگیر کرتگیں چریک ءِ کوش ھوار اِنت۔
آئی ءَ گوشتگ که مرچی بی ایل اے ءِ سرمچاراں شال ءِ ھند ڈگاری ءَ پاکستانی پوج ءِ بمب درگیجوکیں کارمند ھما وھد ءَ گوں چیرکرتگیں شورھاں نشانگ کرتگ اَنت که آ پیادگ ءَ ھمے ھند ءَ بمب پَٹگ ءَ بیتگ اَنت ، تراک ءِ آسر ءَ زورگریں پوج ءِ دوئیں کارمند جاھی مرتگ۔
جارکش ءَ گوشتگ که بی ایل اے ءِ سرمچاراں سھب ءِ ادار ده ءِ نزیک ءَ زامران ءِ ھند کُلّکی ءَ زورگریں پاکستانی پوج ءِ کارمند ھما وھد ءَ هما وھد ءَ گوں چیرکرتگیں شورھاں نشانگ کرتگ اَنت که آ گوں پرپٹ ءَ روگ ءَ بیتگ اَنت ، تراک ءِ آسر ءَ دو کارمند سک ٹپی بیتگ ءٗ ھمے وڑ ءَ آیانی پرپٹ ءَ تاوان بیتگ۔
آئی ءَ گوشتگ که 26 مئی ءَ دگه یک کاروائی ءَ بی ایل اے ءِ سرمچاراں زامران ءِ ھند ساه دیم ءَ زورگریں پوج ءِ چوکی اُرشے ءَ نشانگ کرتگ ، سرمچاراں ٹوھیں سلاه کارمرز کرتگ اَنت ءُ زورگریں پوج تاوان داتگ۔
جارکش ءَ گوشتگ که ھمے روچ ءَ زامران ءِ ھند آرچنان کور ءَ بی ایل اے ءِ سرمچاراں پاکستانی پوج ءِ راشن بروکیں دو گاڑی گپتگ ءُ مانداشتگ۔
آئی ءَ گوشتگ که بی ایل اے ءِ سرمچاراں 27 اپریل ءَ یک بیڑے ءِ میان ءَ لتیپ ء مھمد الی جاه منند کولواه جت ، دزگیر کرتگ ، ابداٗلتیپ ءَ منّ اِتگ که آ ساری ءَ کمکارے ءِ پارست ءَ گوں بلوچ آجوئی لوٹوکیں گلاں بندوک بیتگ بلے چه ایشی ءَ پد گوں وتگڑیں کشنده ٹولی ءِ کارمند رشید ءَ ھوار بیتگ۔
جارکش ءَ گوشتگ که جست ءُ پرس ءِ میان ءَ ابداُلتیپ ءَ وتی میار من اِتگ اَنت که زورگریں پوج ءِ پرمان ءَ یک رندگیری چِپ وتی چریکے ءَ سر کرتگ ، ھمے چریک ءَ نومبر 2022 ءَ کولواه ءِ ھند جت ءَ چِپ سرمچارانی سامان ءِ ته ءَ چیر داتگ ، اِے وھد ءَ سرمچار ھمے ھند ءَ سپرے ءَ بیتگ اَنت ، پاکستانی پوج ءَ چپ رندگیری کرتگ ءُ آئی ءِ پارست ءَ ڈرون اُرش ءِ ھواری ءَ لشکرکشی بندات کرتگ ، اِے میڑانی آسر ءَ بی ایل اے ءِ سرمچاراں جانی تاوان بیتگ۔
آئی ءَ گوشتگ که ابداُلتیپ ءِ راجدروھی ءِ بنیاد ءَ بلوچ آمیدگس ءَ آئی ءِ مرگ ءِ سزا داتگ ، که سرمچاراں 21 مئی ءَ کولواه ءِ ھند نگور ءَ ایشی سر ءَ کار کرتگ ءُ کشتگ۔
جیھند بلوچ ءَ درشان ءِ گڈی ءَ اے درسیں کاروائیانی زمه واری من اتگ۔
