بلوچ آجوئی لوٹوکیں سروک رھیم بلوچ ایڈوکیٹ ءَ ماں رسانکدر ءَ وتی شنگ کرتگیں درشانے ءَ گوشتگ کہ پاکستان چہ دھکاں گوں میان استمان ءَ دروگ بندگ ءُ رد دیگ ءَ پد 27 سال پیش 28 مئی 1998 ءَ زورگپتیں بلوچستان ءِ ماتکوہ، راسکوہ ءَ پنچ ایٹمی تراک کرتگ، چاگے، دالبندین،ھاران، نوشکے ءُ کِر ءُ کشانی برز ءُ زمین ءِ آپ گوں ایٹمی تابکاریاں سانمند کرتگ۔
آئی ءَ گوشتگ کہ چہ پنجاپی زورگر ءِ نیمگءَ داں آوکیں کرناں پہ بلوچ چکچینی ءِ بنیاد ءِ ایر کنگ ءَ یک کارے اَت۔ اے کار پہ اے دمگ ءَ بلوچ ءِ آھوکیں پدریچ ءِ داں کرناں ودی بوگ ءِ وھد ءَ سانمند کنگ ءُ گوں ودی بوگ ءَ نادراھی ءِ آماچ کنگ ءِ بند ءُ بست بیتگ۔ پاکستان ءِ پنجاپی زورگر ءَ اے مردم کشیں گامگیج چہ ھندوستان ءَ پنجاپ ءِ دیمپانی مھکم کنگ ءِ نام ءَ کرتگ۔
رھیم بلوچ ایڈوکیٹ ءَ گوشتگ کہ پہ پنجاپ ءِ دیمپانی مھکم کنگ ءَ زورگپتیں بلوچستان ءَ ڈگار ءُ آزمان چہ ایٹمی تابکاریاں تباہ کرتگ کہ اے ناشریں پنجاپ ءِ زورگری ءَ بلوچ دژمنی ءُ نوک آبادکاری سسا ءُ شونداتاں شریں وڑے ءَ پیش دار ایت۔ لٹ ءُ پُلیں پنجاپ ءَ چہ ھندوستان ءِ کینگ ءُ دژمنی ءَ اچ چاگے ءَ بگر داں بگلچر، کوہ ءِ سلیمان ءَ بلوچستان گوں ایٹمی تابکاریاں سکا سانمند کرتگ۔ چہ پنجاپی زورگر ءِ دست ءَ اچ گیشتریں تباھی ءِ رکگ ءَ بلوچ راج ءِ کِر ءَ ابید چہ پاکستان ءَ آجوئی ءَ دگہ ھچ راہ نیست۔
