شال: بلوچ ویمن پورم ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ ویمن پورم شال ھنکین ءِ دیوان بنجاھی آرگنائزر ڈاکٹر شلی ءِ چیردستی ءَ برجم دارگ بوتگ، دیوان ءِ مھمان بنجاھی ڈپٹی آرگنائزر ھنیپہ ءُ آرگنائرز ءِ باسک پرزانہ بوتگ اَنت۔
دیوان ءَ بنجاھی سروکاں تران کرتگ ءُ گوشتگ کہ ریاست ءَ بلوچ راج ھر پیمیں زوراکیانی دیمپان کرتگ ءُ بلوچ جنین ءُ مردینانی بگیری ءَ پرکار اِنت ءُ مرچی بلوچستان ءِ کنڈ کنڈ ءَ بلوچ جنین ریاست ءِ زوراکیانی بگیری ءَ اوشتاتگ اَنت۔ بلوچ راج ریاست ءِ زوراکیانی بگیری ءَ جوانیں وڑے ءَ جھد کنگ ءَ اِنت ایشی ءِ تہ ءَ جنین دیم ءَ گندگ بیت ءُ جوانیں کردے پیلو کنگ ءَ اَنت۔ بلوچ جنینانی اے کار پہ راجی پدریچ ءَ جوانیں کردے پیلو کنت۔
آیاں گوشتگ کہ بلوچ ویمن پورم ھمے سرپد بیت کہ بلوچ جنین راجدوستی پڑا مھکم بہ بنت ءُ آیاں یک راھبندے ءِ پارست ءَ جوانیں کردے پیلو کنگ لوٹ ایت۔ چہ بلوچ راجدوستی ءَ ما وتی راجی پدریچ ءِ جھد ءَ کرت کن این ءُ اے وھد ءِ لوٹ اِنت کہ بلوچ جنین بلوچ راجدوستی ءَ جوانیں کردے پیلو بہ کن اَنت ءُ سیاست ءِ پارست ءَ وتی ھک ءُ سرڈگار ءِ پاسبانی ءَ بہ کنت۔
آیاں گوشتگ کہ اے وھد ءَ بلوچستان ءَ مردمی جاور ءُ مردمی ھکانی پادمال کنگ وتی گُڈی ھد ءَ سر اِنت، بلوچ ورنا گوں ترندی ءَ زور بیگواہ کنگ بوگ ءَ اَنت ءُ زور بیگواھیں مردمانی کچ گیشتر بوتگ۔ مارا بژن اِنت کہ لشکر ءِ نیمگ ءَ ھمک روچ ءِ بنیاد ءَ گسانی سر ءَ بیڑ برگ، سامانانی لٹ ءُ پل، زھگ ءُ جنینانی ترسینگ مردمی ھکانی میان استمانی راھبند ءِ بگیری اِنت زوت بند کنگ بہ بیت۔
آیاں دیمتر ءَ گوشتگ کہ روانک ءَ بلوچ جنیناں شریں وڑے ءَ بھر زرتگ اے ھمے گپ ءِ پدرائی ءَ کنت کہ بلوچ جنین بلوچ راجدوستی ءِ بنیاد ءَ وتی پرزا پیلو کنگ ءَ ھچ وڑیں دیمونی دیگ ءَ چک ءُ پد نہ بنت ءُ راجی جھد ءِ تہ ءَ جوانیں کردے پیلو کنگ ءَ ھمک وھد ءَ جاڑیگ اَنت ءُ بلوچ ویمن پورم پہ جنیناں راجدوستی ءِ بنیاد ءَ یک راھبندے مھکم کنگ ءِ جھد ءَ اِنت۔
بلوچ ویمن پورم ءِ دیوان ءَ جتائیں بنگپانی سر ءَ تران کنگ ءَ پد آھوکیں گامگیج ءِ بنگپ ءَ شال ھنکین ءِ آرگنائزر باڈی ءِ ٹھینگ بوتگ، ماروش آرگنائزر، نرگس سلتانہ ڈپٹی آرگنائزر، شربانو، شاری، سمیہ آرگنائزر باڈی ءِ باسک گچین کنگ بوتگ اَنت۔
