بلوچ وومن پورم ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ که بلوچستان ءُ ڈیھ ءِ آدگه ھنداں گوستگیں روچاں بلوچ نودربر ءُ ورناھانی زوربیگواھی ءِ درچ گیش بیتگ ، گوستگیں دو روچ ءِ ته ءَ بازیں کچے ءَ کیس دیم ءَ اتکگ که ریاستی ھوار اَنت۔
جارکش ءَ گوشتگ که ریاستی اداره بلوچ ورناھاں ناشرکار لیک اَنت که اِے یک دروگیں پندلے ، راستی ھمیش اِنت که ورنا یا دروگیں میڑاں کشگ بوگ ءَ اَنت یا بندیگ جاھاں آزارانی نشانگ کنگ بوگ ءَ اَنت ، اِے درچ چوناھا بلوچ ءِ چکچینی ءِ گیش کنگ ءِ بنیاد جوڑ بیتگ۔
آئی ءَ گوشتگ که ھمے روچاں بازیں ورنا زوربیگواه کنگ بیتگ اَنت ، چوش که نودربر زکریا که آ ناسرآباد ، تربت ءِ جاه منند اِنت 24 ءُ 25 مئی ءِ درمیانی شپ ءَ چه کراچی ، ھزاره گوٹ ءَ آوار جنگ بیتگ ، آ یک بے درمانیں نادراھی انکائیلوسنگ اسپونڈلانٹس ءِ نادراهی ءِ آماچ اِنت۔
جارکش ءَ گوشتگ که چه شال ءَ مھسوم شاه ٹاون ءَ ایمل اورنگ زیب 23 مئی ءَ چه گس ءَ کھول ءِ دیم ءَ آوار جنگ بیتگ۔
آئی ءَ گوشتگ که کراچی ءِ ھند ملا ایسا گوٹ ءِ جاه منندیں میر بالاچ بلوچ که آ بلوچ یکجھتی کمیٹی ءِ باسک اِنت ، 20 مئی ءَ چه جام گوٹ ءَ دومی رند ءَ بیگواه کنگ بیتگ۔
جارکش ءَ گوشتگ که بیست ءُ چار مئیءِ سھب ءَ اُبید ء ھسین جاه منند مستونگ چه گس ءَ آوار جنگ بیتگ ، کھول ءَ زھرشانی ءَ دگ بند کرتگ که انتزامیه ءَ داں چار روچ ءَ آئی ءِ یل کنگ ءِ بابت ءَ دلجمی داتگ۔
آئی ءَ گوشتگ که دو برات مھمد اسھاک ءُ ابدُلرزاک که آ شال ءَ کلی منگل آباد ءِ جاه منند اَنت 24 مئی ءَ بیگواه کنگ بیتگ اَنت که انگت آیانی بابت ءَ ھچ وڑیں ھال نیست۔
جارکش ءَ گوشتگ که پسنی ءِ ھند ریک پشت ءِ جاه منندیں گوھر بکش که آ ھجام دکانے ءَ کار ءَ بیتگ ، 24 مئی ءَ بیگواه کنگ بیتگ۔
آئی ءَ گوشتگ که 25 مئی ءَ جیھند ء لیاکت جاه منند تربت ،، بُگ در کانودی کاروائی ءَ بیگواه کنگ بیتگ۔
جارکش ءَ گوشتگ که کسان سالیں ورنا انایت الله که آ تمپ ءِ ھند ملک آباد ءِ جاه منند اِنت 25 مئی ءَ ریاستی جوڑکرتگیں ٹولیاں آور جتگ۔
بلوچ وومن پورم ءِ جارکش ءَ درشان ءِ گڈی ءَ اِے درسیں زوربیگواھی ویل ایر جتگ اَنت ءُ گوشتگ که چه ریاستی شونداتانی سوب ءَ بلوچستان ءِ ایمنیں جاور گنتر بیتگ اَنت ءُ اِے شوندات بلوچ راج ءِ بگیری ءَ دژمنی کنگ ءِ منانک اَنت. بلوچ وومن پورم ءَ لوٹ کرتگ که زوریں بیگواھی ، درکانودی کوش ءُ انسانی ھکانی پادمالی زوت بند کنگ به بنت ءُ بلوچ راج ءَ راھبندی ءُ انسانی ھک دیگ به بیت۔
