بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ دو سرمچار کیچ ءِ ھند بلیده ءَ گوں زورگریں پاکستانی لشکر ءُ آئی ءِ جوڑ کرتگیں کشنده ٹولی ءِ کارمنداں میڑے ءَ شھید بیتگ۔
آئی ءَ گوشتگ که 21 مئی ءَ بی ایل اے ءِ سرمچاراں بلیده ءِ ھند گردانک ءَ زورگریں لشکر ءُ وتگڑیں کشنده ٹولی ءِ کارمندانی شکی ئیں تر ءُ گرد ءِ ھال ءِ بنیاد ءَ گشت بندات کرتگ، شپ ءِ وھد ءَ ” بلو کوئی گز ” ءَ سرمچار گوں دژمن ءِ چریکاں دچار کپتگ اَنت ءُ ایشی ءِ آسر ءَ ترندیں میڑے بندات بیتگ۔
جارکش ءَ گوشتگ که اِے میڑ داں ادارے ءَ برجاه بیتگ که چه ایشی ءَ زورگریں پاکستانی لشکر ءُ آئی ءِ ھندی چریکاں جانی تاوان بیتگ، اِے میڑ ءَ بی ایل اے ءِ دو سرمچار سنگت جابر نسیر ءُ سنگت پکیر جان شھید بیتگ اَنت۔
آئی ءَ گوشتگ که شھید سنگت جابر نسیر پنام ءِ سمیر ء نسیر ، بلیده ءِ ھند زیردان ءِ جاه منند اِنت آ 2020 ءَ گوں بی ایل اے ءَ بندوک بیتگ ءُ آئی ءَ ساری ءَ شھری چیرجنگی ءَ وتی کرد پیلو کرتگ ۔آ 2021 ءَ کوهی سنگراں اتکگ ءُ جتائیں ھنداں وتی کرد پیش کرتگ۔
جارکش ءَ گوشتگ که سنگت جابر گل ءِ گشتی کمان ءِ زمه دارے بیتگ ، زامران ، دشت ، سائیجی ءُ تربت ءَ بازیں کاروائیاں ھوار بیتگ ءُ دژمن ءِ بگیری ءَ جوانیں کرد پیلو کرتگ ۔آ یک پُر کار ءُ جپاکشیں سرمچارے بیتگ ، آئی ءَ وتی زند په دژمن ءِ تاوان دیگ ءَ گوازینتگ۔
آئی ءَ گوشتگ که سنگت پکیر جان پنام ءِ میرجان ء گلام ، بلیده ءِ ھند گردانک ءِ جاه منند اَنت۔ آ 2022 ءَ گوں بی ایل اے ءَ ھوار بیتگ ءُ کسانیں وھدے ءَ گوں وتی سوھوئی ، ستک ءُ رازداری ءَ گل ءِ یک جوانیں کارکنے جوڑ بیتگ ،آئی ءَ تربت ، بلیده ، زامران ، ھیرونک ءُ سامی ءِ سنگراں وتی کرد پیلو کرتگ۔ پیکر جان یک کار زانت ءُ آشوبی ورنایے بیتگ۔
جیھند بلوچ ءَ درشان ءِ گڈی ءَ گوشتگ که اِے سرمچارانی پیمیں شھید نه ایوک ءَ بی ایل اے ءِ بلکیں سرجمیں بلوچ گھگیری زرمبشت ءِ مڈی اَنت ،آیانی شھیدی زلم آماچیں راج ءِ زانشت ، توکل ءُ آجوئی ءِ واھگ ءَ گیش کنت، سنگت جابر ءُ سنگت پکیر جان ءِ جھد ءُ دیمونی آھوکیں پدریچ ءِ راه ءِ چراگ اَنت ، بلوچ راج چه وتی زھگانی دیمونی ءَ هجبر شموشکار نه بیت ءُ داں آیانی کارواں داں گڈی منزل ءَ برجاہ بیت۔
