آواران: کولواہ ءَ زورگریں پاکستانی لشکر ءَ ورنایے آوار جنگ ءَ پد کشتگ ءُ آئی لاش چگل داتگ۔
اھوالکار ءِ رد ءَکشگ بیتگیں ورنا ءِ نام گوس بکش ء ماسٹر الاھی بکش اِنت کہ سری مالار مچی ءِ جاہ منند اِنت زی زورگریں پاکستانی لشکر ءَ وتی بنجل ءَ لوٹاھینتگ ءُ مرچی آئی لاش چہ وھلی ڈل ءَ دست کپتگ۔
چوش کہ پاکستانی لشکر ءَ پنچ روچ پیش چہ کولواہ ءِ میتگ گشانگ ءَ ساجد ء مستری ناسر نامیں ورنایے آوار جتگ ءُ دومی روچ ءَ کشتگ ءُ آئی ءِ تیرسپتگیں لاش مالار چیل ءَ چگل داتگ اَت۔ ھپتگے پیش زورگریں پاکستانی لشکر ءَ چہ کولواہ ءِ میتگ مالار بنگل بازار ءَ لیویز کارمند یونس ء رسول بکش آوار جتگ اَت ءُ آئی تیرسپتگیں لاش چگل داتگ اَت۔پد ءَ پاکستانی لشکر ءَ یونس بی ایل ایپ ءِ سرمچارے لیک اتگ ءُ آئی دروگیں میڑ ءَ کشگ ءِ ٹاپار جتگ اَت۔
دہ روچ ءِمیان ءَ زورگریں پاکستانی لشکر ءَ تیوک ءَ چہ کولواہ ءَ سے مردم شپ ءَ آوار جتگ ءُ دومی روچ ءَ آیانی تیرسپتگیں لاش چگل دیگ بیتگ اَنت۔
