بلوچ آجوئی لوٹوکیں سروک رھیم بلوچ ایدوکیٹ ءَ ماں رسانکدرءَ وتی شنگ کرتگیں درشانے ءَ گوشتگ کہ پاکستانی لشکر ءِ دست ءَ یک پجاروکیں اھوالکارے ءِ کوش ءِ ھال اش کنگ ءَ دل بے چاڑ ءُ دردیگ بوت۔ چوش کہ ھمے سال ءِ مارچ ءَ لشکر ءِ دست ءَ شھید لالا لتیپ ءِ یک زھگ ءُ گھار زتکے مشکے ءَ چہ گس ءَ آوار جنگ ءُ کشگ بنت پد ءَ آیانی لاش چگل دیگ بنت۔ گوستگیں لھتیں دھک اِنت کہ زورگپتیں بلوچستان ءَ پاکستان ءِ ریاستی ناشرکاری تیز کنگ بیتگ اَنت ءُ اے روچ پہ روچ گیش بوگ ءَ اِنت۔ ایشی آسر ءَ بلوچستان ءَ لشکرکشی، زوریں بیگواھی، ژانگولیں لاشانی چگل دیگ، نشانگ کنگ ءُ کشگ، مچی مانشانی دزکپگ ءُ بلوچستان ءِ مادنانی لیلام کنگ ءِ گپ ءَ ابید آدگہ ھال سکا کم پہ وانگ ءُ گوش دارگ ءَ دست کپ اَنت۔ شھید لالا لتیپ ءَ من چہ 1990 ءَ زان آں کہ من ھما وھد ءَ بی ایس او ءِ بنجاھی کمک سرکماش بیتگ آں لالا جان بی ایس او مشکے ھنکین ءِ کماش بیتگ۔
آئی ءَ گوشتگ کہ وانگ ءُ نودربر سیاست ءَ پد من وکیلی ءِ کار کرتگ ءُ سیاست ءِ سپر برجاہ داشتگ گڑا لالا جان اھوالکاری ءِ راہ ءَ شتگ کہ پہ بلوچستان ءَ یک جنگ آماچیں دمگے ءَ آس ءُ آپ ءِ تہ ءَ بڈگ ءَ کم نہ اِنت۔ 1990 ءِ دھک ءِ گڈی ءُ انوگیں کرن ءِ بندات ءَ من پہ پارٹی ءِ پروگراماں بھر زورگ ءَ مشکے شتگ آں اود ءَ گوں لالا جان ءَ گندک کرتگ۔ اے وھد ءَ مشکے ءَ روتاک انتھاب ءَ ھوار گیشتر روتاکانی جھگیر لالا جان بیتگ۔ آ سکا مزن دل، کندوک، باسما ءُ تچکیں وتن دوستے اَت۔
بلوچ سروک ءِ گوشگ اِنت کہ من ءَ یاد اِنت لالا جان ءِ گون ءَ نیم دھکے ءَ پیش گندوک بیتگ اَت آ لنگ اَت، بلے اے وھد ءَ پاکستانی لشکر ءُ چیریں ادارھانی نیمگ ءَ چونیں ھم پہ بلوچے ءِ کشگ ءُ بندیگ کنگ ءَ امر، کماشی، جاندراھی ءُ نادراھی ءَ ھچ پرک نہ کرتگ۔ کسے ءِ بلوچ ءُ باسما بوگ ءَ آئی سر برگی اِنت۔ زورگر ھمے سرپد بیت کہ ریاستی ناشرکاری ءُ بلوچ چکچینی ءِ پارست ءَ بلوچ راجی آجوئی زرمبشت دارگ بیت، اے وڑ ءَ تھنا پاکستان سرپد نہ بیت بلکیں گوستانگ گواہ اِنت ھمک زورگر ءِ مارشت ھمے بیتگ ءُ پد ءَ پروش ءُ چہ جھان ءِ نکش ءَ گار بوگ آیانی نسیب ءَ بیتگ۔
رھیم بلوچ ایدوکیٹ ءَ گوشتگ کہ من شھید لال لتیپ جان ءِ کھول ءِ گم ءَ یک پیم ءَ شریدار آں ءُ ھمے دوا کن آں پاکیں ھاوند آئی ءَ باگیں بھشت ءَ جاگہ بہ دنت ءُ آئی کھول ءَ اے گرانیں گم ءِ اوپار کنگ ءِ ھاٹیگ ءَ بہ دنت۔
