شال/تربت/ گوادر/ آواران/نوشکے؛ زورگریں پاکستانی لشکر ءَ یک ھپتگے ءِ میان ءَ دہ مردم آوار جتگ ءُ بیگواہ کرتگ۔
دوشی شال ءَ زورگریں پاکستانی لشکر ءُچیریں ادارھانی کارمنداں سیاسی کارکن ماہ جبین ءِ گس ءَ بیڑ برتگ ءُآئی بچک ایمل بلوچ ء اورنگزیب ءَ آوار جتگ ءُ گوںوت برتگ۔ زور بیگواھیں ایمل بلوچ ھشت تبک ءِ نودربرے۔
ایمل بلوچ ءِ زوریں بیگواھی ءِ گپ آئی مات ماہ جبین ءَ راست کرتگ ءُ گوشتگ کہ پاکستانی لشکر ءَ دوشی ادار سے ءَ مئے گس ءَ بیڑ برتگ ءُ منی زھگ آوار جتگ ءُ گوں وت برتگ۔ ما باز منت کرتگ کہ ایمل بلوچ ءَ یل بہ کن اِت بے میار اِنت آیانی گوشگ بیتگ کہ ما آئی ءَ جست ءُ پرس کن این ءُ پد ءَ یل کن ایں۔
ھمے وڑ ءَ 21 مئی ءَ چہ تربت ءَ پاکستانی لشکرءَ مھیب اللہ ء مھمد الی نامیں مردمے آوار جتگ ءُ بیگواہ کرتگ۔ بیگواھیں مھیب اللہ زمباد گاڑی ءِ ڈرائیورے ءُ سھر گیشکور ءِ جاہ منند اِنت۔
ھمے روچ ءَ پاکستانی لشکرءَ گوادر ڈور ءَ گسے ءَ بیربرتگ ءُ ھمل ء شوکت آوار جتگ ءُ گوں وت برتگ۔ پاکستانی لشکر ءَ بیڑ برگ ءِ میان ءَ گرانھادیں سامان ھم دزاتگ اَنت۔
آواران ءِ ھند جاھو، کنگرائی ءِ جاہ منند سلتان ء ھیربکش دو روچ اِنت کہ بیگواہ اِنت انچو گمان کنگ بوگ ءَ اِنت کہ پاکستانی لشکر ءَآوار جتگ ءُ بیگواہ کرتگ۔
دومی نیمگ ءَ چہ چاگے ءَ نوشکے ءَ روکیں سےمردم ھسین اھمد ء ابدُلگپور، رمزان ء ابدلگپور ءُ مھمد داؤد ء ابدالھک بیگواہ اَنت۔ آیانی موبائل نمبر ھم بند اَنت۔ ھمے گمان کنگ بوگ ءَِاِنت کہ پاکستانی لشکر ءَ آوار جتگ اَنت۔
ھمے وڑ ءَ 14 مئیءَ پیر داد ھکیم ءُ سادل واجداد چہ گڈگی کیلکور ءَ دیم پہ کولواہ ءَ روگ ءَ بیتگ اَنت کہ پاکستانی لشکر ءَ آوار جتگ ءُ بیگواہ کرتگ اَنت۔
