شال: وی بی ایم پی ءِ شدکشیں زھرشانی گدان ءَ 15 سال، 6 ماہ ءُ بیست ءُ چار روچ سرجم بیتگ۔ چوش کہ پہ بیگواھیں مردمانی پدجنگ ءَ شدکشیں زھرشانی گدان وی بی ایم پی ءِ کمک سرکماش ماما کدیر ءِ سروکی ءَ برجاہ بیتگ، بلے انوں آ نادراہ اِنت گدان یک نوکیں سروکے ءِ پارست ءَ برجاہ بیتگ۔
پنچ شمبے ءِ روچ ءَ ماما کدیر ءِ ساڑی نہ بوگ ءَ زھرشانی گدان چہ ایگزیکٹو کمیٹی ءِ باسک نیاز مھمد نیچاری ءِ سروکی ءَ برجاہ بیتگ۔ اے درگت ءَ آئی ءِ گوشگ اِنت کہ زوریں بیگواھی پہ بلوچستان ءِ ھستمان ءَ ٹوھیں ٹپے۔ دانکہ یک مردمے بیگواہ اِنت ما وتی جھد ءَ برجاہ دار ایں۔
نیاز نیچاری ءِ گوشگ اِنت کہ ماما کدیر گوستگیں شانزہ سال اِنت اے گدا ن گوں مھکمی ءَ برجاہ داشتگ، اے نہ تیوک ءَ یک چیدگی کارے بلکیں پہ زور بیگواھیں مردمانی کھولاں یک اوستے۔
آئی ءَ گوں سرکار ءَ لوٹ کرتگ کہ درسیں زور بیگواھیں مردم زوت آجو کنگ بہ بنت ءُ اے زوریں بیگواھیانی درچ بند کنگ بہ بیت دانکہ بلوچستان ءِ مردم پہ شرپ زند بہ گوازین اَنت۔
