بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے سنگت منیر بلوچ ءُ سنگت زاھر بلوچ راجی آجوئی ءِ راه ءَ شھید بیتگ اَنت ، آیانی دیمونی ءَ ستک شانی ندر کن اِیں.
آئی ءَ گوشتگ که بی ایل اے ءِ سرمچار منیر بلوچ پنام ءِ ابدالله 5 مئی 2025 ءَ یک کارے ءَ دگ ویلے ءَ شھید بیتگ، سنگت منیر بلوچ پنام ءِ ابدالله ء رشید بلوچ کیچ ءِ ھند دشت شولی ءِ جاه منند اَت، آ 2013 ءَ گوں بلوچ راجی آجوئی ءَ بندوک بیتگ که آئی ءَ دشت ءُ تلار ءِ سنگراں وتی کرد پیلو کرتگ ، آئی ءِ برات سنیر بلوچ ھم راجی آجوئی ءِ راه ءَ شهید بیتگ.
جارکش ءَ گوشتگ که سنگت منیر یکشلیں جھد ءِ کردی چیدگ اِنت ، آئی ءَ وتی زند ءِ ھمک روچ ءُ شپ په راجی آجوئی ءَ ندر کرتگ اَنت ءُ داں گڈی وھد ءَ په اِے مادنیں راه ءَ وتی کرد برجاه داشتگ اَنت۔
آئی ءَ گوشتگ که سنگت شھید زاھر بلوچ پنام ءِ ملا یک دسمبر 2023 ءَ پنجگور ءِ ھند گرمکان ءَ زورگریں لشکر ءُ وتگڑیں کشنده ٹولی ءِ گون ءَ میڑے ءَ شھید بیتگ، سنگت زاھر ء ابدُلسمد پنجگور ءِ ھند وشبود ءِ جاه منند اَت ، آ 2017 ءَ گوں بی ایل اے ءَ بندوک بیتگ ءُ په راجی آجوئی ءَ وتی کرد پیلو کرتگ اَت ،شھید زاھر ءِ شھیدی ءَ پد آئی ءِ شھید بوگ ءِ ھال ءُ بی ایل اے ءِ گون ءَ بندوک بوگ، گل ءِ رازداری ءِ پارست ءَ چیر دیگ بیتگ دانکه اِے برجاھیں کار که آئی ءِ گون ءَ هوار بیتگ سرجم به بیت۔
جارکش ءَ گوشتگ که شھید سنگت زاھر یک وش تب، سنگین ءُ چه آجوئی لیکھ ءَ سر ریچیں بیتگ، آئی ءِ سادگیں تب ءُ راجی زانشت ءَ آئی ءَ را سنگتانی میان ءَ یک جتائیں جاگھے داتگ.
آئی ءَ گوشتگ که اِے دوئیں سرمچار شھید سنگت منیر ءُ زاھر بلوچ ءَ گوں وتی ھون ءَ زرمبشت ءَ سنج بکشاتگ ، آیانی شھیدی بلوچ ءِ راجی دیمونی ءُ جھد ءِ رژنائیں نشان اَنت، بی ایل اے آیانی دیمونی ءَ دروت نَدْر کنت ءُ ھمے کول ءَ کنت که آیانی کاراں برجاه دار ایت۔
