ھاران | لسبیله: چه بلوچ یکجھتی کمیٹی ءِ نیمگ ءَ ڈاکٹر ماه رنگ ءُ بی وائی سی ء آدگه سروک ءُ کارکنانی دزگیری ، بلوچستان ءَ زوریں بیگواھی ، درکانودی کوش ءُ ریاستی زوراکیانی بگیری ءَ زھرشانی روانک کشگ بیتگ.
بنشون ءِ رد ءَ مرچی بی وائی سی ءِ جار ءِ رد ءَ مرچی ھاران ءِ شھر ءَ زھرشانی روانکے کشگ بیتگ ، روانک چه نواب اکبر بگٹی اسٹیڈیم ءَ درکپتگ ءُ شھر ءِ جتائیں دگاں ترّ ءُ گرد کرتگ ، اِے روانک ءَ جنین ، زھگ ءُ کماشاں ھوار مردماں بازیں کچے ءَ بھر زرتگ، زھرشانی کنوکاں بینر ، پلے کارڈ ءُ بی وائی سی ءِ سروکانی اکس دست ءَ بیتگ ءُ اوگام جتگ ، آیاں ڈاکٹر ماه رنگ ءُ بی وائی سی ءِ کارکناں ھوار زوربیگواھیں مردمانی یل کنگ ءِ لوٹ کرتگ.
ھمے وڑ ءَ چه بلوچ یکجھتی کمیٹی ءِ نیمگ ءَ ھب چوکی ءِ تیاب دپی ھند گڈانی ءَ ھم زھرشانی روانکے کشگ بیتگ ، زھرشانی ءَ ھندی مردماں تران کرتگ ءُ بی وائی سی ءِ سروک ءُ کارکنانی سر ءَ برجاھیں زوراکیانی ایر جتگ اَنت ، آیاں گوں لس مردماں توار چست کنگ ءِ لوٹ کرتگ.
بی وای سی ءِ رد ءَ اِے زھرشانی چه گل ءِ نیمگ ءَ بلوچستان ءَ زھرشانیانی برجاه دارگ ءِ بھر اَنت که ایشی ءِ مول بلوچستان ءَ زوریں بیگواھی ءُ درکانودی کوش ءِ وڑیں ریاستی برجاھیں زوراکیانی بگیری ءَ لس مردمانی ته ءَ زانت ءُ سرپدی ء ودی کنگ اِنت ، چه ایشی ءَ تربت، مستونگ، پنجگور ءُ ھب چوکی ءَ اِے زھرشانی روانک کشگ بیتگ اَنت.
بی وائی سی ءَ گوشتگ که ما اِے گپ ءَ تچک کن اِیں که مئے اے وڑیں اینمیں زھرشانیانی زرمبشت داں ھما وھد ءَ که زوربیگواھیں مردم یل کنت نه بنت، دزگیر کنگ بیتگیں سروکاں انساپ دیگ نه بیت ءُ ریاست بلوچستان ءِ ته ءَ وتی زوراکیانی درچ ءَ ھلاس مه کنت برجاه بنت۔
