مستونگ: بلوچ یکجھتی کمیٹی ءِ جار ءِ رد ءَ مرچی مستونگ ءَ بی وائی سی ءِ سروکانی ناھکیں دزگیری، بلوچستان ءَ درکانودی کوش، زوریں بیگواھی ءُ ریاستی زوراکیانی گیش بوگ ءِ بگیری ءَ زھرشانی روانکے کشگ بیتگ۔
زھرشانی کنوکاں ڈاکٹر ماه رنگ بلوچ ءَ ھوار بی وائی سی ءِ آدگه سروک ءُ کارکنانی یل کنگ ءِ لوٹ کرتگ ءُ گوشتگ که ریاستی زوراکیانی بگیری ءَ لس گھگیری گوں ترندی ءَ چِست بیت ءُ په انساپ ءُ شرپ ءَ برجاھیں جھد دارگ نہ بیت۔
آیاں گوشتگ که ریاست ءَ بلوچ ءِ چکچینی ءِ درچ گیش کرتگ، ھمے وڑ ءَ اِے چکچینی ءِ بگیری ءَ چست بیتگیں تواراں گوں زور ءَ ایر جنگ ءَ اِنت، آمیدگس ھم په سرکار ءِ پله مرزی ءَ درکانودی دزگیریانی بگیری ءَ بے توار اِنت۔
زھرشانی کنوکاں گوشتگ که بی وائی سی یک راجی زرمبشتے اِنت ءُ آئی ءَ بلوچ راج ءِ ته ءَ روتگ جتگ ، اِے زرمبشت گوں زور ءَ ھلاس کنگ نه بیت۔
