تربت: بلوچ یکجھتی کمیٹی ءِ سروکانی یل نہ کنگ ءِ بگیری ءَ بی وائی سی ءِ نیمگ ءَ زھرشانی روانکے کشگ بیتگ۔ زھرشانی روانک چہ ایڈوکیٹ دگ ءَ درکپتگ ءُ چہ سنیما چاراہ ءَ شھید پدا اھمد چارہ ءَ مچ بیتگ اَنت۔
زھرشانی روانک ءَ سیاسی ءُ چاگردی کارکن، نودربر، جنین ءُ زھگاں ھوار لس مردماں بازیں کچے ءَ بھر زرتگ۔ آیاں بی وائی سی ءِ سروکانی دزگیری، ورنایانی زوریں بیگواھیءُ درکانودی کوش ءِ بگیری ءَ اوگام جتگ۔
زھرشانی کنوکاں بی وائی سی ءِ سروک ڈاکٹر ماہ رنگ بلوچ، بیبو بلوچ، گلزادی بلوچ، سبگت اللہ شاہ جی بلوچ ءُ بیبگر بلوچ ءِ ناھکیں دزگیری درکانودی لیک اتگ ءُ آمیدگس ءِ سر ءَ شرگداری کرتگ ءُ گوشتگ کہ آمیدگس ھم آجو نہ اِنت بلکیں ریاستی ادارھانی چیردستی ءَ کارکنگءَ اَنت۔
آیاں گوشتگ کہ بی وائی سی ءِ دزگیریں سروک بے ارزی ءَ دیر اِنت کہ بندیگ اَنت۔ آ 3 ایم پی او ءِ وڑیں کانود ءِ پارست ءَ یل کنگ بوگ ءَ نہ اَنت۔
آیاں گوں اکوام متھدہ، انسانی ھکانی گل ءُ سیول سوسائٹیءَ لوٹ کرتگ کہ آ بلوچ سیاسی سروکانی دزگیری ءُ بلوچستان ءَ برجاھیں انسانی ھکانی لگتمالی ءِ سر ءَ دلگوش بہ دے اَنت۔
