بلوچ نیشنل موومنٹ ءِ کارگشاد ءُ زرمبش براڈکاسٹنگ کارپوریشن ءِ نوک گچین بیتگیں کارمستر دل مراد بلوچ ءَ گوشتگ کہ زرمبش ٹی وی زوت وتی شنگکاریءَ بندات کنت، درسیں چن ءُ لانچ ءُھیلکاری سرجم بیتگ اَنت، شمبے ءِ روچ ءَ زرمبش ٹی وی بلوچی زبان ءَ وتی شنگکاری ءَ بندات کنت۔
آئی ءَ گوشتگ کہ ز رمبش ریڈیو ءَ دراجکشیں وھدے بیت کہ بلوچ راجی توار، جھد، درد ءُ وابانی داں جھان ءَ سر کنگ ءِ بنشون جوڑ بیتگ۔ نوں یک نوکیں درچے بندات کنگ ءَ اِنت۔
دل مراد بلوچ ءَ گوشتگ کہ من ءَ اے جار ءِ جنگ ءَ وشی بوگءَ اِنت کہ زرمبش ریڈیو نوں زرمبش ٹی وی ءِ نام ءَ یک اسٹوڈیویے جوڑ کنت دانکہ یک مھکم، زمہ وار ءُ پرکاریں راجی رسانکدری راھبندے ءِ بنیاد ءَ وتی کار ءَ دیم ءَ ببارت۔
نوں زرمبش ٹی وی چہ وتی درسیں کد ءُ کساس ءَ ابید بنداتی بھر ءَ بلوچ راج ءِ داں جھان ءَ سر کنگ ءَ بلوچی زبان ءُ پد ءَ براھوئی، اردو ءُ انگریزی زبانءَ شنگکاری بندات کنت۔
آئی ءَ گوشتگ کہ ما اے پیسلہ ھمے ارادہ ءِ بنیاد ءَ کرتگ کہ بلوچ راج ءِ مچی درد، راجی گھگیری ءُ انسانی ھکانی لگتمالیاں میان استمانی تک ءَ دیم ءَ بیار ایں دانکہ جھان چہ بلوچ ءِ راستی ءَ سرپد بہ بیت ءُ میان استمان دلگوش ءَ گور بہ کنت۔
زرمبش سرپد بیت کہ اے کاروان داں ھما وھد ءَ سوبین بیت کہ بلوچ ءِ ھمک مردم، اگاں آ نودربرے یا کارکن،ازمکارے یا لبزانکارے، چہ سرڈگار ءَ ڈن نشتگ یا وتی ڈگار ءَنشتگ، وتی بھر ءَ ھوار بہ کنت ۔ پمشکا زرمبش ٹی وی گوں درسیں بلوچاں، زانوگر، گل، اھوالکار، گوں تکنیک زانوک ءُ گوں ھمدرداں لوٹ کنت کہ اےسپر ءَ مئے کمک ءَ بہ کن اَنت۔
