بلوچ لبریشن آرمی ( بی ایل اے ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں اورناچ، پنجگور، کلات، نوشکے ءُ سبی ءَ ھپت جتائیں کاروائی کرتگ۔ آیانی تہ ءَ مزنیں شھدگ بستگ، زورگریں لشکر ءِ سر ءَ بمب ءُ سلاہ بندیں ارش، کمکارانی کوش ءُ چوکیانی دستیگ کنگ ھواراَنت۔ اے کاروائی بی ایل اے ءِ ھیروپ آپریشن ءِ دومی بھرگ ءِ چن ءُ لانچ ءِ پارست ءَ اُرشانی بھر اَنت۔ اے میان ءَ سرجم ءَ پنجاہ ءُ ھشت جاھاں ھپتاد ءُ ھشت کاروائی کرتگ۔
آئی ءَ گوشتگ کہ بی ایل اے ءِ سرمچاراں شمبے ءِ شپ ءَ ھزدار ءِ ھند اورناچ دوراھی ءَ شھدگ داں دو ادار ءَ گیش بستگ۔ اے میان ءَ پٹ ءُ پول ءِ درچ برجاہ بیتگ، بلوچ راجی مڈیانی لٹ ءُ پل ءَ ھواریں دو گاڑی نشانگ کرتگ۔ سرمچاراں لیویز چوکی دستیگ کنگ ءَ پد مانداشتگ۔
جارکش ءَ گوشتگ کہ بی ایل اے ءِ سرمچاراں شمبے ءِ شپءَ پنجگور نوک آباد ءَ زورگریں پاکستانی لشکر ءِ یک چوکی یے نشانگ کرتگ۔ سرمچاراں گوں وتکاریں سلاھاں زورگریں لشکر ءِ سر ءَ ارش کرتگ۔ گوں راکٹ لانچر ءُ گرنیڈ لانچر ءَ دژمن ءِ سر ءَ باز گولا آس داتگ۔ داں بیست ءُ پنچ دمان ءَ گیش برجاھیں اُرش ءَ زورگریں لشکر ءِ کم چہ کم دو کارمند مرتگ۔
آئی ءَ گوشتگ کہ دگہ یک کاروائی یے ءَ سرمچاراں پنجگور ءِ ھند پروم جاھین ءَ چه زورگریں پاکستانی لشکر ءِ نیمگ ءَ جتگیں کیمرہ گوں وت برتگ اَنت۔
جارکش ءَ گوشتگ کہ سرمچاراں کلات ءِ ھند گراپ ءَ زورگریں پاکستانی لشکر ءِ بمب چاروکیں کارمند ھما وھد ءَ گوں چیر کرتگیں شورھاں نشانگ کرتگ اَنت کہ آ پٹ ءُ پول ءَ دلگوش بیتگ اَنت۔ تراک ءِ آسر ءَ دژمن ءِ دو کارمند مرتگ۔
آئی ءَ گوشتگ کہ سرمچاراں نوشکے ءِ ھند گلنگور ءَ زورگریں پاکستانی چیریں ادارھانی چار کارمند مئین ء گلام مستپا جاہ منند پاکپتن، ھزیپہ ء مھمد لتیپ جاہ منند پاکپتن، امران الی ء مکسود اھمد ءُ ارپان الی ء مکسود اھمد جاہ منند رھیم یار ھان کشتگ اَنت۔
جارکش ءَ گوشتگ کہ اے کارمند 9 مئی ءَ بی ایل اے ءِ سرمچاراں چہ نوشکے ءِ ھند اھمد وال ءَ دگ بندی ءِ میان ءَ دزگیر کرتگ اَنت۔ جست ءُ پرس ءِ میان ءَ آیان من اتگ کہ آیاں وتی دروشم مٹ کرتگ ءُ پہ زورگریں پاکستانی لشکر ءُ چیریں ادارھاں چاریگی ءِ کار ءَ کنگ ءَ بیتگ اَنت۔
آئی ءَ گوشتگ کہ بی ایل اے ءِ سرمچاراں سبی ءَ ریلوے اسٹیشن ءَ برجاھیں پاکستانی لشکر ءِ یک چوکی یے گون دستی بمب ءَ نشانگ کرتگ۔
جارکش ءَ گوشتگ کہ ھمے وڑ ءَ سرمچاراں کچی ءِ ھند مٹھڑی ءَ زورگریں لشکر ءِ یک چوکی یے اُرشے ءَ نشانگ کرتگ۔ ایشی آسر ءَ دژمن ءِ کم چہ کم سے کارمند ٹپی بیتگ اَنت۔
جیھند بلوچ ءَ وتی درشان ءِ گڈی ءَ گوشتگ کہ اے ارش زورگریں ریاست ءِ بگیری ءَ بی ایل اے ءِ گھگیری شوندات ” ھیروپ آپریشن ” ءِ درچ ءِ بھر اَنت۔ بی ایل اے تچکی ءَ گوش ایت دانکہ راجی آجوئی گرگ نہ بیتگ اے وڑیں کاروائی برجاہ بنت۔
