بلوچ راجی رھشون ءُ بی ایل ایپ ءِ سروک ڈاکٹر اللہ نزر بلوچ ءَ ماں جھان ءِ نام ءَ وتی یک کلوھی تامربندے اردو زبان ءَ شنگ کرتگ ءُ گوشتگ کہ من پمشکا اردو ءَ تران کن آں کہ لس مردم یا پنجاپی زانوگر شریں وڑے ءَ سرپد بہ بنت آجوئی ءِ جھد چی یے ءُ زورگپتی توان یا زورگری چی یے۔ بلوچ راج پہ وتی پل اتگیں آجوئی ءِ گرگ ءَ جھد کنگ ءَ اِنت ءُ په ایشی ءَ درسیں میان استمانی راھبنداں کار گرگ ءَ اِنت۔
آئی ءَ گوشتگ کہ بلوچانی آجوئی جھد میان استمانی تک ءَ شریں وڑے ءَ چارگ ءُ منگ بوگ ءَ اِنت، ایشی ءَ پاکستانی اسٹیبلشمنٹ ھیران کرتگ۔ چی ءَ کہ چونیں ھم ریاستے پاشزم، شائوزم ءُ گوں زوراکیاں جوڑ بہ بیت انچوش کہ پاکستان اِنت آ وت میان استمانی تک ءَ وتی ناشریانی پاشک بوگ ءَ گندگ ءَ اِنت ھیران اِنت۔
ڈاکٹر اللہ نزر بلوچ ءَ گوشتگ کہ پاکستان نہ تیوک ءَ یک شائونسٹ ریاستے ءُ آئی سر ءَ پنجاپ بادشاھی کنگ ءَ اِنت، بلکیں ایشی ءَ جھان وتساچیں نیمونگے ھم گوشگ ءَ اَنت۔ "روگ اسٹیٹ” (rogue state)، "بڈیپ اسٹیٹ”، "آئبرڈ رجیم” اے درس پاکستان ءِ سر ءَ گندگ بنت۔ ایشی لشکر یک باڑھی لشکرے ءِ پارست ءَ کار کنت، آ پہ میان استمانی نپاں ابید پہ وتی مول ءِ پارست ءَ کار کنگ ءَ اَنت۔ پہ اے گپ ءِ ھلاس کنگ ءَ پاکستان ءِ اسٹیبلیشمنٹ وتی درسیں ناشرکاراں کار گرگ ءُ ھمے گپ ءِ رد کنگ ءِ کوشست ءَ کنگ ءَ اِنت۔ اے رد ءَ پیشیگیں نگران مزن وزیر انوار الھک کاکڑ ھم ھوار اِنت۔ پہ پگار ءِ گیش کنگ ءِ وڑیں زاتی نپاں کار کنگ ءَ بیتگ ءُ انوگیں مزن وزیر سرپراز بگٹی ھم انچوش اِنت۔ اے لس مردمانی نہ بلکیں جی ایچ کیو ءِ جھگیر اَنت۔
بلوچ رھشون ءَ گوشتگ کہ من سرپراز بگٹی ءَ بس ھمنچو گوشگ لوٹ آں کہ تو گلام ھسین مسوری بگٹی ءِ مانش ءِ سر ءَ لانت گوشگ ءَ ئِے آ بگٹی ءَ پہ وتی سرڈگار ءَ دیمونی داتگ۔ بلے تو گوں اے سرڈگار ءَ گداری کرتگ۔ تو بلوچ راجی آجوئی جنگ ءِ بگیری ءَ ناشریں مارشت ءِ رندگیر جوڑ بیتگ ئِے، اے جنرل گریسی ءِ وڑیں انگریز زوراکانی گُڈ اِنت۔ تو گلام ھسین مسوری بگٹی ءِ دیمونی لگتمال کرتگ اَنت۔
ڈاکٹر اللہ نزر بلوچ ءَ گوشتگ کہ من اے گپ ءَ گیش کنگ نہ لوٹ آں بلے گوستانک مارا گوش ایت وھدے کہ ناشریں ریاست چہ تہ ءَ نزور بیت گڑا پہ آجوئی زرمبشتانی دارگ ءَ ناھکیں زوراکی کنت۔ مرچی بلوچ سرمچار، رسانکدری کارکن، کودکیں ورنا زنداناں بندیگ اَنت، پمشکا کہ آ پہ وتی پجار ءُ ھک ءَ گپ کن اَنت۔ اے ریاست ھمک وھد ءَ پہ وت دژمن جوڑ کنت، چی ءَ کہ آ چہ اندر ءَ ھلاس بیتگ ءُ آئی ءَ پروش وارتگ، پمشکا بے شرپیں گامگیج زورگ ءَ اِنت ءُ سرجمیں بلوچ راج ءَ "بلوچ شائونسٹ” یا "بلوچ ایکسٹریمسٹ” گوشگ ءُ بنام کنگ ءَ اِنت۔ راستی ھمیش اِنت کہ نہ بلوچ شائونسٹ اِنت ءُ نہ ناشرکار اِنت ما انسان دوست ایں، آجوئی لوٹوکیں ءُ پہ وتواکی ءَ جھد کنگ ءَ اِیں۔
بلوچ رھشون ءَ گوشتگ کہ بلوچانی گپ انوگیں میان استمانی تک ءَ جْوانیں وڑے ءَ گوش دارگ بوگ ءَ اِنت، انوں پاکستان ریاست یک نوکیں پندلے ءِ سازگ ءِ جھد ءَ اِنت کہ بلوچ ، پنجاپیاں نشانگ کنگ ءَ اَنت۔ چونا راستی ھمیش اِنت ھپت لک لشکر ءُ اگاں ریٹائریں کارمنداں ھوار بہ کن ئے گڑا بیست داں بیست ءُ پنچ لک مردم بلوچ ءِ مڈیانی سر ءَ زورگپت اِنت ءُ گوں ھما مڈیاں مئے چکچینی ءَ کنگ ءَ اَنت۔ لس پنجاپی سپاھی چونیں زردار یا باپارے ءِ زھگ نہ اِنت آ لس پنجاپی اَنت بلے آ یک انچیں نزامے ءِ کمکار اَنت کہ آ نہ آیاں بکش اَنت ءُ نہ مارا۔
آئی ءَ گوشتگ کہ بلے وانوک ءُ نبشتہ کنوکیں پنجاپیاں اے مارشت نیست کہ بلوچ ایردست اَنت ءُ ما زورگپت ایں، بلے آیاں لوٹ ایت کہ اے ناشریں ریاست ءِ ناشریں لشکر ءِ کمکار مہ بنت۔ بلے مارا اے گپ دوست نہ بیت بدکیت کہ پنجاپیانی کشت ءُ کوش یا لس مردم وت ءَ پنجاپی گوشگ ءَ اَنت ما آیانی بگیر ایں، چی ءَ کہ مارا چہ گوستانک ءَ ایشی درور دست کپ ایت لیاکت الی ھان ءَ پاکستان جوڑ کرتگ بلے جنگ بیتگ، بٹھو ءَ کانسٹیٹشن ءُ وتگڑیں ایمٹی توان داتگ آ ھم کشگ بیتگ۔ بے نزیر ءَ آئی جند ءِ مردماں کشتگ، لیاکت الی ھان ءِ کشندھاں داں انوں لب دیگ بوگ ءَ اِنت۔ بلوچ ءِ آجوئی جنگ ءِ بگیری ءَ مزنیں لشکرکشی بوگ ءَ اِنت، آئی لشکر ءَ سسائی پروش وارتگ نوں دگہ گپے جنگ ءَ اَنت۔
ڈاکٹر اللہ نزر بلوچ ءَ گوشتگ کہ من اے گپ ءَ تچک ءَ گوش آں که تیوک ءَ ایران ءُ اوگانستان ءَ بلوچ جنگ بوگ ءَ نہ اَنت انچوش کہ آئی ءِ ساری ءِ لشکری سروک ءَ وت گوشتگ کہ نوں پرو ایکٹیو ءِ کار ءَ کن ایں، جھان ءِ کج ءَ ھم بلوچے ھست جنگ بیت۔ پہ درور کینڈا بلوچ رھشون لمہ کریمہ بلوچ ءُ سوئیڈن ءَ بلوچ زانوگر ساجد ھسین جنگ بیتگ۔ پہ وتی پنجاپی وکاس گورایہ ءِ جنگ ءَ برتانیہ ءَ مردم دیم دیگ بیتگ اے درس جھان ءِ دیم ءَ مزنیں منانکے ءُ چوش کہ لندن ءَ یک ویلے بوتگ آئی ءَ ھم پاکستان ھوار اِنت۔
