اسلام آباد پریس کلب ءِ دیم ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ نشتگیں زور بیگواھیں کزاپی نیچاری ءُ کپایت اللہ نیچاری ءِ گس ءَ پاکستانی لشکر ءَ بیڑ برتگ۔
بلوچ یکجھتی کمیٹی ءَ ماں چاگردی رسانکدر ءَ گس ءَ پاکستانی لشکر ءِ بیڑ برگ ءِ تامربند شنگ کرتگ کہ تامربند ءَ گندگ بیت پاکستانی لشکر ءِ کارمندے آیانی گس ءَ پترگ ءَ اَنت۔
بی وائی سی ءِ گوشگ اِنت کہ مرچی چار ءَ پاکستانی لشکر ءُ چیریں ادارھانی کارمنداں کزاپی نیچاری ءُ کپایت اللہ نیچاری ءِ گس ءَ بیڑ برتگ۔ گسانی پٹ ءُ پول کنگ ءِ ھواری ءَ گوں مردماں زوراکی کرتگ ءُ ترسینتگ اَنت۔
بی وائی سی ءِ زھرشانی نندانک ءَ نشتگیں کھول ءِ گوشگ اِنت کہ ریاست مئے زور بیگواھیں آزیزانی آجوئی ءَ ابید مارا یکشل ءَ بیھار دیگ ءَ اَنت کہ کھول توار چست مہ کنت۔
آئی ءَ گوشتگ کہ بلوچ چکچینی ءِ بگیری ءَ برجاھیں زھرشانی ءَ نشتگیں مردم پاکستانی لشکر ءِ نیمگ ءَ نشان کنگ بوگ ءَ اَنت اگاں چونیں تاوانے بوت ایشی زمہ وار ریاست اِنت۔
