بلوچ وومن پورم ءِ جارکش ءَ ماں رسانکدر ءَ وتی شنگ کرتگیں درشانے ءَ بلوچستان ءَ برجاھیں دروگیں میڑاں چہ آوار جتگیں بلوچانی درکانودی کوش ءِ سر ءَ بژن درشان کرتگ ءُ گوشتگ کہ ریاستی ادارہ چہ پیسر ءَ زور بیگواہ کرتگیں مردماں دروگیں میڑاں شھید کنگ ءُ ھمے پدّر کنگ ءَ اِنت کہ آ میڑ ءَ جنگ بوتگ اَنت۔ بلے چوش کہ بلوچ راج ایشی ءَ اوپار نہ کنت۔
آئی ءِ گوشگ اِنت کہ انوں پاکستانی لشکر ءَ تربت نادراھجاہ ءَ سے لاش آرتگ کہ آ چہ پیسر ءَ زوربیگواھیں مردماں پجارگ بوتگ اَنت۔
آئی گوشتگ کہ چہ آیاں امران بلوچ ء ابدُلوھید تربت دشتی بازار ءِ جھمنند اِنت کہ 9 اپریل 2025 ءَ پاکستانی لشکر ءَ آوار جتگ، ھمید بلوچ ء مولا داد کہ آپسر ءِ جھمنند اِنت پاکستانی لشکر ءَ 14 اپریل 2025 ءَ بیگواہ کرتگ ءُ ارشاد زباد ء زباد بلوچ کہ کولواہ جت بازار ءِ جاہ منند اِنت ءُ پاکستانی لشکر ءَ 5 اپریل 2025 ءَ آوار جتگ۔
جارکش ءَ گوشتگ کہ 11 مئی ءَ دگہ یک زوربیگواھیں ورنایے وھید بلوچ ء کریم داد ءِ تیرسپتگیں لاش چہ پنجگور رکشان کئور ءَ دزکپتگ کہ آ 2021 ءَ زوربیگواہ کنگ بوتگ اَت۔
آئی گوشتگ کہ ھمے وڑ ءَ لال جان ء الاھی بکش کہ ٹاپلو زامران ءِ جھمنند انت گوستگیں شپ ءَ پَنجگُور ءَ پاکستانی لشکر ءَ تیرگواری کرتگ ءُ شھید کرتگ۔ چہ ایشی ءَ پیش سمیر اھمد ء سبزل کہ آ یک ڈرائیورے بوتگ 1 مئی 2025 ءَ زوربیگواہ کنگ بوتگ ءُ 9 مئی ءَ آئی لاش چگل دیگ بوتگ۔ اھسان شوکت کہ 4 مئی ءَ سرکار ءِ جوڑ کرتگیں کشندہ ٹولی ءِ کارمنداں تیرگواری کرتگ ءُ کشتگ۔
آئی گوشتگ کہ بلوچ وومن پورم چہ ریاست ءَ ھمے لوٹ ءَ کنت کہ پہ بلوچ راج ءِ پھریزگ ءَ سنگین بہ بیت ءُ انسانی ھکانی لگتمالی ءَ بند بہ کنت۔ میان استمانی تک، بزاں انسانی ھکانی گلانی گون ءَ لوٹ کن ایں کہ بلوچستان ءَ برجاھیں بلوچ چکچینی ءِ دارگ ءَ وتی کرد ءَ پیلو بہ کنت۔
جارکشءَ گوشتگ کہ ریاست ءُ آئی ادارہ بلوچ ورناھانی زند ءِ ارزشت ءَ بہ زانت اگاں نہ اے زبھر چہ ریاست ءَ گیشتر بے اوست کنت۔
