بلوچ لبریشن آرمی ( بی ایل اے ) ءِ جارکش جیھند بلوچ ءَماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں پسنی ءَ پاکستانی لشکر ءِ چیریں ادارہ آئی ایس آئی ءِ سروگانے کُشتگ ءُ دگہ سَے جتاھیں کاروائیاں پاکستانی لشکر، پولیس ءُ سیندک پروجیکٹ ءِ گاڑی نشانگ کرتگ اَنت ءُ شھدگ بستگ۔
آئی گوشتگ کہ بی ایل اے ءِ سرمچاراں دوشی گْوادر ءِ ھند پسنی شھر ءَ یک چیریں ھالے ءِ بنیاد ءَ پاکستانی لشکر ءِ چیریں ادارہ انٹر سروسز انٹیلیجنس (آئی ایس آئی) ءِ سروگان مھمد نواز ء مھمد آزم کہ ھکیم والا چورنگی ءِ نزیک ءَجوھرآباد، کوشاب (پنجاب) ءِ جھمنند انت، آ ھما وھد ءَ نشانگ کرتگ کہ آئی وتی دروشم مٹ کرتگ ءُ کشندہ ٹولی ءِ کارمندانی ھمراھی ءَ گاڑی ءِ سر ءَ سپر ءَ بوتگ۔ اُرش ءَ کشندہ ٹولی ءِ کارمند سلمان ء منیر اھمد ھم مرتگ کہ پسنی ببر شور ءِ جھمنند اِنت ءُ دگہ یک کارمندے شاہ نزر ٹپی بوتگ ءُ آیانی گاڑی سرجم ءَ تباہ بوتگ۔
آئی گوشتگ کہ آئی ایس آئی ءِ سروگان ءِ ڈیوٹی گْوادر ءَ بوتگ کہ آئی سر ءَ بی ایل اے ءِ چیریں ٹولی “زراب” ءِ چم سک بوتگ اَنت دوشی وھدے کہ اے سروگان پسنی ءِ راہ ءَ سپر کنگ ءَ بوتگ سرمچاراں پسنی شھر ءَ شپ ءِ ادار ھپت ءُ نیم ءَ مسکان چاراہ ءَ مانشجاہ ءِ نزیک ءَ گوں چیرکرتگیں شورھاں نشانگ کرتگ۔ پسنی ءِ شھر ءَ آئی ایس آئی ءِ سروگان ءَ کشندہ ٹولی ءِ سروگ بالاچ کمک کنگ ءَ بوتگ۔
جارکش ءَ گوشتگ کہ بی ایل اے ءِ سرمچاراں زی زامران ءِ ھند جمکی تنک ءَ پاکستانی لشکر ءِ کارمند گوں سنائپر ءَ نشانگ کرتگ اَنت کہ یک کارمندے جاھی مرتگ۔
آئی گوشتگ کہ بی ایل اے ءِ سرمچاراں زی کلات ءِ ھند منگچر کزینئی ءَ شال ءُ کراچی ءَ روکیں شھدگ بند کرتگ ءُ پٹ ءُ پول کرتگ۔ ھمے میان ءَ سرمچاراں سیندک پروجیکٹ ءِ گاڑی نشانگ کرتگ انت۔
جارکش ءَ گوشتگ کہ دگہ یک کاروائی یے ءَ بی ایل اے ءِ سرمچاراں یک شمبے ءُ دوشمبے ءِ میانی شپ ءَ بولان ءِ ھند ڈاڈر ءَ پولیس ءِ سر ءَ دستی بمب اُرشے کرتگ۔
جیھند بلوچ ءَ درسیں اُرشانی زمہ واری من اِتگ اَنت ءُ گوشتگ کہ پاکستانی لشکر ءُ آیانی شوربندیانی سر ءَ مئے اُرش گوں ترندی ءَ برجاہ بنت۔
