بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں تربت، ھوشاپ ءُ مستونگ ءَ سے جتائیں اُرشاں زورگریں پاکستانی لشکر ءُ مادن بروکیں گاڑی نشانگ کرتگ اَنت. اُرشاں زورگریں پاکستانی لشکر ءِ دو کارمند مرتگ ءُ سے گاڑی تاوان داتگ۔
آئی ءَ گوشتگ که بی ایل اے ءِ سرمچاراں 25 اپریل ءِ شپ ءَ تربت ءِ شھر سٹلائٹ ٹاون ءَ بالی پٹ دگ ءَ زورگریں پاکستانی لشکر ءِ کاروان گوں چیر کرتگیں شورھاں نشانگ کرتگ. تراک ءِ زد ءَ دژمنیں لشکر ءِ یک بکتربند گاڑی یے اتکگ که ایشی ءِ آسر ءَ دژمن ءِ یک کارمندے جاھی مرتگ ءُ دو ٹپی بیتگ. ھمے وڑ ءَ گاڑی سکا تاوان بیتگ۔
جارکش ءَ گوشتگ که بی ایل اے ءِ سرمچاراں دومی اُرش ءَ کیچ ءِ ھند ھوشاپ ، دمب ءَ زورگریں پاکستانی لشکر ءِ برجاھیں بنجل ءِ پھازداریں کارمند نشانگ کرتگ اَنت. سرمچاراں دژمن ءِ کارمندانی سر ءَ ھما وھد ءَ اُرش کرتگ که آ بنجل ءِ دیم ءَ تر ءُ گرد کنگ ءَ بیتگ اَنت. اُرش ءِ آسر ءَ لشکر ءِ یک کارمندے جاھی مرتگ ءُ دگه دو ٹپی بیتگ۔
آئی ءَ گوشتگ که سیمی کاروائی ءَ بی ایل اے ءِ سرمچاراں مستونگ ، چوتو ءَ بلوچ ءِ مڈیانی لٹ ءُ پل ءَ ھواریں دو گاڑیانی سر ءَ تیرگواری کرتگ ءُ تاوان داتگ اَنت.
جیھند بلوچ ءَ درشان ءِ گڈی ءَ سئیں اُرشانی زمه واری من اِتگ۔
