بلوچ آجوئی لوٹوکیں سروک ءُ بی این ایم ءِ پیشگیں سرکماش ھلیل بلوچ ءَ ماں چاگردی رسانکدر ایکس ءَ شھید پدائی شاری بلوچ ءِ شھیدی سالروچ ءِ درگت ءَ نبشتگ کہ مرچی شاری بلوچ ءِ شھیدی سالروچ اِنت کہ آ یک مزن زانتیں جنین ءُ دو زھگانی مھروانیں مات بیتگ۔ آئی ءَ وتی زاتی واھشت ءُ واب یل داتگ اَنت ءُ پہ راجی آجوئی جھد ءَ وتی زندگی ببا داتگ۔
آئی ءَ گوشتگ کہ شاری بلوچ ءَ وتی جان ءِ دیمونی داتگ ءُ زورگریں چین ءُ کراچی ءَ پاکستان ءِ نوک آبادکاریں شریداراں یک کلوھے داتگ ءُ نوکیں گوستانکے زندگ داشتگ۔ یک انچیں گوستانکے کہ ایشی بلوچ جنینانی سْیاسی زانت، توکل ءُ دیمونی گیشتر توانمند کرتگ اَنت۔ شاری بلوچ ءِ اے کار یک ویلے نہ اِنت بلکیں ایردستی ءِ ھپتادیں سالانی بگیری ءَ یک زھرشانی یے، جھان ءَ را ھمے کلوہ ءَ دنت کہ بلوچ جنین، ناھکی ءُ نودک آبادکاری ءِ بگیری ءَ بے توار نہ بنت۔
ھلیل بلوچ ءَ گوشتگ کہ شاری بلوچ ءَ جنینانی جھد ءَ را نوکیں دروشمے داتگ ءُ ھمے زانت بکش اِتگ کہ پہ دیمونی ءُ جھد ءَ تیوک ءَ مردیناں درکپگ نہ لوٹ ایت بلکیں جنین ھم پہ وتی سرڈگار، پہ وتی زھگ ءُ وتی پجار ءِ رکینگ ءَ جھد ءِ پڑا جْوانیں آسرے ءَ سر بوت کنت۔
بلوچ سروک ءَ گوشتگ کہ مرچی ما شاری بلوچ ءِ یات ءَ سر ءَ جھل کن ایں ءُ اے درگت ءَ مارا وتی مچی زمہ واریانی سر ءَ پد ءَ چارگ لوٹ ایت ءُ وتی شھیدانی راہ ءَ جنزگ ءُ پہ آجوئی ءِ گرگ ءَ جھد دیم ءَ برگ لوٹ ایت۔
