بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ کواجہ آسپ ھمے گپ من اتگ کہ پاکستان ءَ روکپت ءِ گوشگ ءَپد ءَ جھادیانی پلہ مرزی کرتگ، چوناھا اے گپ راست اِنت کہ پاکستان دو دیمی ءُ ناشرکاری ءِ بنیاد ءَ برجاہ اِنت۔
آئی ءَ گوشتگ کہ بلے اے گپ ءِ پیش کنگ رد اِنت کہ پاکستان ءَ جھادیانی پلہ مرزی چہ ڈنیانی زور ءَ کرتگ۔ بلے راستی ھمیش اِنت کہ پاکستان ءِ ناشری ءِ پیش دارگ ءِ شوندات سک دیر اِنت بندات کنگ بیتگ۔
ڈاکٹر نسیم بلوچ ءَ گوشتگ کہ پاکستان ءِریاستی ناشرکاری ءِ بنیاد چہ 27 مارچ 1948 ءَ گندگ بیت کہ آئی بلوچستان ءِ سر ءَ ارش کرتگ ءُ پہ زور یکجاہ کرتگ۔ چہ آ روچ ءَ بگر داں انوں زوراکی، ناشرکاری ءُ آزار دیگ نہ تیوک ءَ بلوچستان ءَ بلکیں سرجمیں دمگ ءَ پاکستان ءِ شوندات ءِ بنیاد گندگ بیت۔
آئی ءَ گوشتگ کہ راستے پاکستان ءَ سرد جنگ ءِ میان ءَ سوویت یونین ءِ بگیریءَ جھادی ھیل داتگ اَنت، بلے چہ سوویت یونین ءِزوال ءَ پد ھم اے درچ نہ اوشتاتگ۔ پاکستان ءَ ھما ناشرکاریں ٹولی چہ سیمسر ءَ ڈن کارمرز کرتگ ءُ ھمساھگیں ڈیھ جنجال کرتگ اَنت ءُ جھان ءَ بلیک میل کنگ ءَ اِنت۔
ڈاکٹر نسیم بلوچ ءَ گوشتگ کہ نائن الیون ءَ پد ناشرکاری ءِ بگیری ءَ یک ھمسنتی ءِ دروشم ءَ پاکستان ءَ چہ امریکہ ءُ آئی ھمسنتیں ڈیھاں اربانی کچ ءَ ڈالر کمک زرتگ۔ بلے آچہ ھمے زراں الکاھده ءُ نوں داھش ( لشکر کراسان ) ءَ پناہ دیگ ءُ پلہ مرزی کنگ ءَ اِنت۔
بی این ایم ءِ سرکماش ءَ گوشتگ کہ پاکستان ءَ نہ تیوک ءَ ھمے میان استمانی توانمندانی دروگ بستگ کہ آیاں ایشی سر ءَ بیسہ کرتگ، بلے آئی لس بلوچانی گون ءَ ھم دروگ بستگ۔ زور ھوار کنگ ءُ چہ آئی ءَ پد پاکستان ءَ پہ بلوچ سروکانی رد دیگ ءَ کرآن کارمرز کرتگ۔ مرچی ھم آ ھما ھیلہ ءَ جتائیں دروشماں کارمرز کنگ ءُ بلوچستان ءَ زوریں بیگواھی، بندیگیں مردمانی آزار دیگ ءُ درکانودی کشت ءُ کوش ءَ کنگءَ اِنت۔
آئی ءَ گوشتگ کہ پاکستان ریاست روکپتی شونداتانی آماچ نہ اِنت بلکیں اے آئی وتی ناشرکاری لیکہ اِنت۔ کواجہ آسپ ءِ دانک پھلی یے نہ اِنت یک سرپدی یے دانکہ جھان آئی ءَ جست مہ کنت پاکستان وتی دو دیمی شوندات ءَ برجاہ دار ایت۔
