شال: بلوچ یکجھتی کمیٹی ءِ سروک ڈاکٹر سبیه بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که گوں بژن ءَ گوشگ لوٹ آں که گلزادی بلوچ یکبرے پد ءَ ریاستی زندان ءَ آزار. دیگ بیتگ. مرچی آئی ءِ نزیکیں آزیزے ءَ که گوں آئی ءَ گِندوک کرتگ اِے گپ راست کرتگ که آئی ءِ جان ءُ دروشم ءَ آزارانی نشان گندگ بیتگ اَنت. چه ایشی ءَ پیش هم گلزادی زندان ءَ آزار دیگ بیتگ بلے گوستگیں روچ ءَ زرگونه ترین نامیں سروگانے ءَ آئی ءِ گٹ ءَ گشان لوپ کرتگ ءُ آئی ءَ را مرگ ءِ بیھار داتگ ءُ گوشتگ که تئی زند منی دست ءَ اِنت.
ڈاکٹر سبیه بلوچ ءَ گوشتگ که اِے تھنا بندیگی نه اِنت بلکیں ھما مھکمیں شوربندی اِنت که آئی ءِ پارست ءَ ریاستی اداره بلوچ جنیناں جانی ءُ سسائی آزارانی نشانگ کنگ ءَ اَنت. اِے آزار بس یکے ءِ سر ءَ نه اِنت بلکیں یک ایمنیں راجی زرمبشت ءِ سر ءَ اُرش اِنت. اِے زوراکی ءِ پارست ءَ مئے راجی گھگیری بے توار کنگ ءِ جھد ءَ کنگ اَنت، بلے ما تچک ءَ گوش اِیں لیکه گوں زمزیلاں بندیگ کنگ ءُ زرمبشت گوں لٹ ءُ توپک ءَ ھلاس کنگ نه بنت.
آئی ءَ گوشتگ که ما تھی کارانی اداره ، سی ٹی ڈی ءُ بندیگ جاه ءِ سروکاں اِے رستری کارانی زمه وار لیک اِیں، ما ھمے لوٹ ءَ کن اِیں که گلزادی بلوچ ، ڈاکٹر ماه رنگ بلوچ ، بیبو بلوچ ءُ آدگه سیاسی بندیگانی سر ءَ آزار دیگ زوت بند کنگ به بیت، آیانی جانی ءُ سسائی سلامتی بابت ءِ دلجمی دیگ به بیت، زرگونه ترین ءِ ھواری ءَ درسیں زمه واریں کارمندانی بگیری ءَ کانودی گامگیج زورگ به بیت.
ڈاکٹر سبیه بلوچ ءَ بلوچستان ءِ لس مھلوک، انسانی ھکانی میان استمانی گل ءُ جھان ءِ گوں انساپ لوٹوکاں اِے رستری ءِ بگیری ءَ توار چست کنگ ءِ لوٹ کرتگ ءُ گوشتگ که انوں بے توار بوگی نہ اِنت بلکیں گھگیری کنگی اِنت، زوراک ءِ ھمک زوراکی ءِ پسّو ءَ گوں یکمشتی ، تچکی ءُ مھکمی ءَ دے اِیں.
