بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ وتی شنگ کرتگیں دشانے ءَ گوشتگ کہ کاؤنٹر ٹیررازم ڈیپارٹمنٹ ( سی ٹی ڈی ) لشکر ءِدست ءَ ھدہ زندان ءَ چہ پیسر ءَ بندیگیں بلوچ یکجھتی کمیٹی ءِ کارکن بیبوبلوچ ءِ آزار دیگ ءُ آوارجنی ءَ گوں ترندیں دانکاں ایرجن ایں۔
آئی ءَ گوشتگ کہ چم دیستگیں مردمانی رد ءَ بیبو بلوچ چہ چیریں جاھے ءَ برگ ءَ پیش آزار دیگ بیتگ۔ گر ءُ چیل بیتگ اَنت ءُ پہ زور چہ زندان ءَ گراں کرتگ ءُ برتگ۔ داں انوں ھچ زانگ بوگ ءَ نہ اِنت آ کج ءَ اِنت ءُ پہ آئی سلامتی ءَ ترسگ ءَ ایں۔
آئی گوشگ اِنت کہ اے جتائیں ویلے نہ اِنت بلکیں ریاست ءِ زوراکیاں تچک ءَ پیش دار ایت، ایشی مول بلوچستان ءَ پر ایمنیں گھگیری ءِ ھلاس کنگ اِنت۔ جنینانی رستری آزار دیگ ریاست ءِ زوریں بیگواھی، وتی دل ءِتب ءَ بندیگ کنگ ءُ آزار دیگ ءِ تکشام ءَ یک رنجیگیں درے گیش کنت۔ ما بیبو بلوچ ءِ پھریزگ ءُ سلامتی ءِ زمہ وار ریاست ءُآئی لشکری ادارھاں سرپد بہ ایں۔ سیاسی بندیگانی گون ءَ رستری رویشت ھلاس کنگ بہ بیت۔
آئی ءَ گوشتگ کہ ما بیبو بلوچ ءِ زوتیں آجوئی ءُ انوگیں بندیگجاہ ءِ بابت ءَ کانود ءِ بستار ءَ منگ ءِ لوٹ ءَ کن ایں۔
آئی ءَ گوشتگ کہ سیاسی کارکنانی بزاں جنینانی ترسینگ، آزار دیگ ءُ پہ زوریں بیگواھی ءِ ھلاس کنگ ءَ میان استمانی انسانی ھکانی ادارہ زوت دلگوش بہ دے اَنت ءُ آ پاکستان ریاست ءَ زور بدے اَنت کہ انسانی ھکانی زمہ واریاں بہ زانت۔ بگیریانی پہ آزار دیگ ءِ پارست ءَ بے توار کنگ میان استمانی کانود ءِ بگیری اِنت۔ لس بلوچ پہ ترسینگ ءَ بے توار نہ بنت۔
