برلن؛ بلوچ یکجھتی کمیٹی ءِ سر ءَ ریاستی زوراکی ءُ سروکانی دزگیر کنگ ءِ بگیری ءَ زی جرمنی ءِ جاہ منندیں بلوچاں زھرشانی کرتگ۔
زھرشانی جرمنی ءِ وھد ءِھساب ءَ نیمروچ ءِ دو ءَ بندات بیتگ ءُ داں بیگاہ ءِ پنچ ءَ برجاہ بیتگ۔زھرشانی روانک چہ ریلوے اسٹیشن ءَ بندات بیتگ ءُ جتائیں جاھاں تر ءُ گرد کنگ ءَ پدشھرءِ بنجاہ ءَ مچ بیتگ اَنت۔
زھرشانی ءَ جرمنی ءِ جاہ منندیں بلوچاں بازیں کچے ءَ بھر زرتگ ءُ آیانی تہ ءَ جنین ءُ زھگ ھم ھواربیتگ اَنت۔ زھرشانی کنوکیں مردماں جتائیں بینر ءُ پلے کارڈ دستاں بیتگ اَنت کہ آیانی سر ءَ بی وائی سی ءِ سروکانی بندیگ کنگ ءِ بگیری ءَ اوگام نبیسگ بیتگ۔
زھرشانی ءَ بی این ایم ءِ بنجاھی پتر ءِ باسک ھمل بلوچ، جرمنی ھنکین ءِ سرکماش شارھسن بلوچ، کمک کارگشاد بانک شلی بلوچ، کارگشاد ابدلجبار بلوچ، بی آر پی جرمنی ءِ سرکماش ابدُلجلیل، بی آر پی ءِ باسک میر ھماد ءُ ملنگ بلوچ، پری بلوچستان موومنٹ ءِ باسک بانک رزیہ بلوچ، ابید بلوچ، پارس بلوچ، ممتاز بلوچ ءُ ابوبکربلوچ ءَ ابید انسانی ھکانی کارکن پرھاد بلوچ، بانک سوبیہ بلوچ، بانک شلی زاکر بلوچ ءُ بانک سارہ بلوچ ءَ تران کرتگ۔
آیاں بلوچستان ءِ انوگیں جاورانی سر ءَ چمشانگ داتگ ءُ بلوچ یکجھتی کمیٹی ءِ سرءَریاستی زوراکی، ڈاکٹر ماہ رنگ بلوچ،سبگت اللہ بلوچ شاہ جی، بیبو بلوچ، بیبگربلوچ، ھمل بلوچ، گلزادی بلوچ، ڈاکٹر سبیہ بلوچ ءُ بیبو بلوچ ءِ پت ءِ دزگیری گوں ترندیں دانکاں ایر جتگ۔
آیاں دیمترءَ گوشتگ کہ پاکستان بلوچستان ءَ انسانی ھکاں گوں ترندی ءَ پادمال کنگءَ اِنت۔ اے انسانی ھکانی لگتمالیانی تہ ءَ زوریں بیگواھی، درکانودی کوش، دروگیں میڑاں بیگواھیں مردمانی کوش ھم ھوار اِنت۔ آیانی بگیری ءَبلوچ یکجھتی کمیٹی زھرشانی کنگ ءَ اِنت بلے پاکستان ریاست آیانی گپ کنگ ءَ ھم اوپار نہ کنت ءُ پہ اے وڑیں توارانی دارگ ءَ ھرپیمیں زوراکی کنگءَ اِنت۔ ایشی درور ڈاکٹر ماہ رنگ ءُ بی وائی سی ءِ سروکانی درکانودی دزگیری اِنت۔
آیاں تران کرتگ ءُ گوشتگ کہ اگاں پاکستان دارگ نہ بوت ءُ انسانی ھکانی لگتمالیانی بابت ءَ جست کنگ نہ بوت گڑا بوت کنت کہ پاکستان بلوچستان ءَ بنگلہ دیش ء وڑ ءَ بہ کنت۔ انوں پاکستانی لشکر ءِ آرمی چیپ جنرل آسم منیر ءَ بیھار داتگ کہ بلوچانی دہ پدریچاں ھلاس کن ایں، ایشی پسو آئی ءَ دیگ لوٹ ایت۔
آیاں گڈی ءَ گوشتگ کہ اے زھرشانی ءِ پارست ءَ گوں میان استمانی ادارہ، اکوام متھدہ، انسانی ھکانی ادارہ، شرپمندیں راجانی گون ءَ لوٹ کن ایں کہ آ دیم ءَ بیا اَنت ءُ پہ بلوچ راج ءُ بلوچستان ءَ توار چست بہ کن اَنت کہ اے آیانی زمہ واری اِنت۔
