بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ ماں رسانکدر ءَ پاکستان ءِ آرمی چیپ آسم منیرءِ گپانی پژدر ءَ وتی شنگ کرتگیں درشانے ءَ گوشتگ کہ پاکستان ءِ آرمی چیپ آسم منیر انوں ھما درشان کہ ” بلوچ راج ءِ دہ پدریچاں لپاشاں ” اے نہ تیوک ءَ یک ترسناکیں چکچینی یے ءِ جار اِنت بلکیں اے ریاست ءِ نوک آبادکاریں سسا ءُ بلوچانی بگیری ءَ آئی کینگداری ءَ پیش دار ایت۔
آئی ءَ گوشتگ کہ اےتیوک ءَ بیھارے نہ اِنت بلکیں یک منگے۔ پاکستانی لشکری ریاست ءِ بے سوبیانی منگ اِنت کہ آ یک انچیں راجے ءَ بے توار کرت نہ کنت کہ آ چہ ھپت دھکاں زورگپتی، لٹ ءُ پل ءُ زوراکیانی بگیری ءَ گھگیری کنگ ءَ اِنت۔
ڈاکٹر نسیم بلوچ ءَ گوشتگ کہ لشکر ءِ یک مزنیں اگدھے ءِ سر ءَ نندوکیں مردمے ءِ زبان ءِ گپ پاکستان ریاست ءِراستیں دروشم ءَ پاشک کنت۔ اے گپ ءَ ھم راست کنت کہ بلوچ تیوک ءَ ناشریں لشکرکشی ءِ دیمپانی ءَ کنگ ءَ نہ اِنت بلکیں آ یک چکچینی تکشامے ءِ آماچ اَنت۔
بی این ایم ءِ سرکماش ءَ گوشتگ کہ اے ھما لشکر اِنت کہ ایشی ھزارانی کچ ءَ بلوچ آوار جتگ، ژانگولیں لاش چگل داتگ، میتگانی سر ءَ بمبگواری کرتگ ءُ نوں تچک ءَ آھوکیں دہ پدریچانی تباہ کنگ ءِ جار ءَ جنگ ءَ اِنت۔
آئی ءَ گوشتگ کہ چہ گوستانک ءَ پدر اِنت کہ راج چہ بیھار ءَ ھلاس کنگ نہ بنت۔ بلوچ راجی جھد ترس ءِ سر ءَ نہ اِنت، بلکیں دیمونی ءُ آجوئی ءِ بے ترسیں واھشتانی سر ءَ اِنت۔ اگاں یک پدریچے ءِ سر ءَ ارش کنگ بیت گڑا دومی پدریچ گیشتر مھکم بیت ءُ پاد کیت۔ چونیں ھم زورے کجام راج ءِ گوں شرپ ءُ آجوئی ءَ بندوکیں ارادہ ءَ ھلاس کرت نہ کنت۔
ڈاکٹر نسیم بلوچ ءَ گوشتگ کہ پاکستانی لشکر ءِ اے گپانی ِ سر ءَ میان استمانی تک ءَ گوں ترندی ءَ ایر جنگ لوٹ ایت۔ اے وڑیں تچکیں بیھارانی دیم ءَ بے توار بوگ زوراکاں گیش کمک کنت۔ بلوچ راج ایشی یاد کنت ءُ گوستانک نہ تھنا ایشی گمان ءَ کنت بلکیں سوادیانی سوڑگ ءَ کنت۔
