پنجگور: پرومءَ زورگریں پاکستانی لشکر ءِ دست ءَ زور بیگواہ کنگ بیتگیں مردمانی کھولاں زھرشانی کرتگ۔ زھرشانی روانک چہ جاھین ءَ درکپتگ ءُ پاکستانی لشکر ءِ مزنیں بنجل ءِ دیم ءَ مچ بیتگ اَنت۔
بلوچ یکجھتی کمیٹی ءَ ھم زور بیگواھیں مردمانی کھول ءِ زھرشانی ءِ پلہ مرزی ءَ جار جتگ۔ زھرشانی ءَ زور بیگواھیں مردمانی کھول، بی وائی سی ءِ سروک، سیاسی ءُ چاگردی کارکناں ھوار جنین، زھگ ءُ لس مردماں بازیں کچے ءَ بھر زرتگ۔
چوش کہ زورگریں پاکستانی لشکر ءَ زی چہ پروم جاھین ءَ زریپ رشید، اتیک الی، ازگر الی، ماجد ھیات، سپی اللہ دلمراد، ابدرھیم منیر ءُ دگہ یک سندی ڈاکٹرے آوار جتگ اَت۔
چہ اے بیگواھیں مردماں ماجد ھیاتءُ سندی ڈاکٹر مرچی آجو بیتگ اَنت، آدگہ مردم انگت ءَ بیگواہ اَنت۔
زور بیگواھیں مردمانی کھولانی گوشگ اِنت دانکہ مئے مردم آجو کنگ نہ بیتگ اَنت ما وتی زھرشانی نندانک ءَ برجاہ دار ایں۔
