اسلام آباد: پاری نومبر ءَ پاکستانی لشکر ءِ دست ءَ زور بیگواہ کنگ بوتگیں ورنا لیاکت زھری ءِ کھول اسلام آباد ءَ شتگ ءُ بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ نشتگ۔
کھول ءِ گوشگ اِنت لیاکت زھری دکاندارے آ ھزدار ءِ ھند زھری ءَ وتی دکان ءَ نندوک بوتگ کہ پاکستانی لشکر ءُ چیریں ادارھانی کارمند باز گاڑیانی سر ءَ آتکگ اَنت ءُ چہ دکان ءَ آوار جتگ ءُ گوں وت برتگ۔ مارا لیاکت ءِ بارو ءَ ھچ وڑیں سرپد دیگ بوگ ءَ نہ اِنت کہ چون ءُ کج ءَ اِنت۔
آئی گوشگ اِنت کہ ما لیاکت زھری ءِ زوریں بیگواھی ءِ بارو ءَ پولیس گوشتگ ءُ بلے آیانی نیمگ ءَ مارا ھچ وڑیں ھال نہ رستگ۔ ما آئی کیس بیگواھیں بلوچانی توار ( وی بی ایم پی ) ءِ کر ءَ ھم یاداشت کرتگ۔
کھول ءِ گوشگ اِنت کہ لیاکت ءِ سر ءَ چونیں بھتامے ھست گڑا آمیدگس ءَ آرگ ءُ پیش کنگ بہ بیت، اگاں بے میار اِنت گڑا زوت یل کنگ بہ بیت۔ چہ لیاکت ءِ زوریں بیگواھی ءَ آئی تیوگیں کھول رنجانی دیمپان اِنت۔
آئی ءَ گوں وتگریں سرکار ءُ مردمی ھکانی ادارھاں لوٹ کرتگ ءُ گوشتگ کہ پہ لیاکت زھری ءِ آجوئی ءَ وتی کرد ءَ پیلو بہ کن اَنت۔
لیاکت زھری ء سالھ مھمد 17 نومبر 2023 ءَ زورگریں پاکستانی لشکر ءُ چیریں ادارھانی کارمنداں چہ زھری ءَ آوار جتگ ءُ بیگواہ کرتگ۔
