بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءَ ھاران، نوشکے، دالبندین، چاگے ءُ بیسیمگ ءَ زھرشانی کنگ بوتگ۔ زھرشانیاں مردماں بازیں کچے ءَ بھر زرتگ۔
زھرشانی ءَ زور بیگواھیں مردمانی کھول، سیاسی ءُ چاگردی کارکن، نودردبر، جنین ءُ زھگ جتائیں بھرگاں سیادی داروکیں مردم گوں بوتگ اِنت۔
زھرشانی ءَ ھواریں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت۔ آیاں زوریں بیگواھی ءُ دروگیں میڑاں زور بیگواھیں مردمانی کوش ءِ بگیری ءُ اسلام آباد ءَ بلوچ یکجھتی کمیٹی ءِ برجاھیں نندانک ءِ پلہ مرزی ءَ اوگام جتگ۔
زھرشانی ءَ مردماں تران کرتگ ءُ گوشتگ کہ بلوچ یکجھتی کمیٹی ءِ نیمگ ءَ اسلام آباد پریس کلب ءِ دیم ءَ زھرشانی نندانک برجاہ اِنت انچو روچ ءِ گوزگ ءَ پد ھم آیانی لوٹ گوش دارگ بوگ ءَ نہ اَنت۔
آیاں گوشتگ کہ پہ زھرشانی نندانک ءِ لوٹانی منگ ءَ سرکار ءِ سگینی چہ ھمے گپ ءَ پدر بیت آیانی بگیری ءَ کشندہ ٹولی ءِ کارمند آرگ ءُ آیانی دیم پہ دیم ءَ نندارینگ بوتگ اَنت۔
آیاں گوشتگ کہ ریاست چہ زوراکیاں بلوچ یکجھتی کمیٹی ءِ برجاھیں زھرشانی نندانک ءَ ھلاس کنگ لوٹ ایت بلے چوش نہ زانت کہ یک بلاھیں راجے گوں اے زرمبشت ءَ بندوک اِنت۔ اے گپ پہ آئی ءَ منانکے کہ ھمک روچ بلوچستان ءَ پہ زھرشانی نندانک ءِ پلہ مرزی ءَ ھزارانی کچ ءَ مردم زھرشانی کنگ ءَ اَنت۔
