بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں ھاران ءَ یک کاروائی یے ءِ میان ءَ لیویز تانہ دستیگ کرتگ ءُ اود ءَ درسیں سلاہ برتگ اَنت ءُ دمگ ءَ تر ءُ گرد کرتگ۔
آئی گوشتگ کہ دوشی شپ ءِ ادار یک ءِ نزیک ءَ ھاران ءِ ھند مسکان کلات ءَ لیویز ءِ یک تانہ ئے سرمچاراں انگر کرتگ ءُ وتی دست ءَ کرتگ۔ اے کاروائی ءِ میان ءَ تانہ ءَ ساڑی ئیں دہ کارمند دزگیر کرتگ ءُ اود ءَ درسیں سلاہ ءُ لشکری سامان دستیگ کرتگ اَنت۔ پُلگ بوتگیں سلاھاں سیزدہ سی تیری (کلاشن) ءُ دگہ سامان ھوار اَنت۔ دزگیر کرتگیں کارمند راجی میارباری ءَ ھوار نہ بوتگ اَنت ءُ آ یل داتگ انت۔
جارکش ءَ گوشتگ کہ اے کاروائی ءَ پد سرمچاراں دمگ ءَ تر ءُ گرد برجاہ داشتگ دانکہ زورگریں لشکر ءِ پسھی کاروائی ءِ دیم ءَ داشت بہ کن اَنت ءُ دمگ ءَ وتی ساڑی بوگ ءَ پیش داشتگ۔
آئی گوشتگ کہ لھتیں روچ پیش ڈی آئی جی رکشان ءِ سروکی ءَ یک دیوانے ءَ پیسلہ کنگ بوتگ اَت کہ اگاں چونیں بلوچ ورنایے ءِ گوں بلوچ آجوئی لوٹوکیں گلاں سْیادی زانگ بوت گڑا پولیس ءُ لیویز ءَ موکل دیگ بیتگ اَنت کہ اے وڑیں مردم ھما دمان ءَ تیر جنگ بہ بنت۔ اے وڑیں شونداتانی مول لیویز ءُ پولیس کارمنداں بلوچ راج ءِ بگیری ءَ اوشتارینگ ءُ آیاں ریاست ءِ زوراکیانی کمک کار جوڑ کنگ اِنت۔ اے پندل ھندی لشکر ءُ بلوچ راج ءِ میان ءَ دوری یے ءِ ودی کنگ ءِ جھد ءَ اِنت۔
کہ لیویز ءُ پولیس کارمند گیشتر ھندی بلوچ اَنت۔ ھمے سوب ءَ آیاں گیشتر گوں گل ءَ دژمنی نیست۔ اگاں اے کارمند ریاست ءِ زوراکیاں ھوار بوت اَنت ءُ بلوچ راج ءِ سر ءَ زورکی کرت اش گڑا آ نشانگ کنگ بنت
جارکش ءَ گوشتگ ۔ اے وڑیں درسیں ناشرکار کہ ریاست ءِ زوراکی ءَ ھوار اِنت، آ اگاں بلوچے بہ بیت آ ھم بکشگ نہ بیت پرچا کہ آ وتی سرڈگار ءُ راج ءِ بگیری ءَ دژمنی ءَ یک وڑ ءَ شریدار اَنت۔
