بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ ماں چاگردی رسانکدر ایکس ءَ نبشتگ کہ بلوچ یکجھتی کمیٹی ءِ سروک سبگت اللہ پنام شاہ جی ءِ زوریں بیگواھی ءَ پد آئی ءِ سر ءَ 3 ایم پی او ءِ پارست ءَ کیس ءِ نبیسگ ریاست ءِ ترس ءَ پدر کنت۔
آئی ءَ گوشتگ کہ سبگت اللہ شاہ جی نہ تیوک ءَ یک سیاسی کارکنے، بلکیں آ بلوچ راجی مچی اوست، زانت ءُ گھگیری ءِ چیدگ اِنت آئی دزگیری ءَ ھمے گپ پدربیت کہ ریاست چہ راستیءَ ترس ایت۔
ڈاکٹر نسیم بلوچ ءَ گوشتگ کہ پاکستان ریاست چہ بلوچ ءِ بنکی جست ءِ پسو دیگ ءَ ابید سیاسی رھشون ءُ کارکناں زور بیگواہ کنگ ءُ دروگیں کیس جنگ ءُ آیاں بندیگ کنگ ءَ اِنت۔
بی این ایم ءِ سرکماش ءَ گوں اکوام متھدہ، انسانی ھکانی گل ءُگوں شرپمندیں جھان ءِ ادارھاں بلوچستان ءِ ناگیگیں جاورانی سر ءَ گوں سنگینی دلگوش کنگ ءِ لوٹ کرتگ۔
