شال: وائس پار بلوچ مسنگ پرسنز( وی بی ایم پی ) ءِ سرکماش نسراللہ بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ زور بیگواھیں نسار اھمد ءِ پت مھمد اسلم ءَ آئی زوریں بیگواھی ءِ کیس گل ءِ کر ءَ یاداشت کرتگ ءُ گوشتگ کہ منی زھگ ڈرائیورے ءُ آئی گوں گاڑیاں کار کرتگ ءُ مئے لاپ والینتگ۔ آ ایپ سی ءُ آدگہ لشکری ادارھانی کارمنداں پاری 29 نومبر ءَ چہ گس ءَ امام بکش بازار آپسر، تربتءَ درکانودی آوار جتگ ءُ بیگواہ کرتگ، مارا مئے زھگ ءِ بابت ءَ ھچ وڑیں سرپدی دیگ ءَ نہ اَنت ءُ چہ ایشی ءَ مئے کھول سکا جنجالانی دیمپان اَنت۔
آئی ءَ گوشتگ کہ مھمد اسلم گل ءِ نیمگ ءَ سدکی دیگ بیتگ کہ آئی زھگ نسار اھمد ءِ کیس ءَبلوچستان سرکار ءُ پہ زور بیگواھیں مردماں جوڑ بیتگیں کمیشن ءَ سرکن ایں ءُ پہ آئی آجوئی ءَ ھمک جاہ ءَ توار چست کن ایں۔
وی بی ایم پی ءِ سرکماش نسراللہ بلوچ ءَ گوں سرکار ءَ لوٹ کرتگ کہ نسار اھمد ءِ سر ءَ چونیں بھتامے ھست دیم ءَ آرگ ءُ آمیدگس ءَ پیش کنگ بہ بیت ءُ ڈیھ ءِ کانود ءِ رد ءَ آئی ءَ وتی بے میار پیش کنگ ءِ موہ دیگ بہ بیت اگاں بے میار اِنت گڑا زوت یل کنگ ءُ آئی کھول چہ رنجاں کشگ بہ بیت۔
