شال : پہ زور بیگواھیں مردمانی پدجنگ ءَ وی بی ایم پی ءِ شدکشیں زھرشانی گدان ءَ 5796 روچ سرجم بیتگ۔ شمبے ءِ روچ ءَ نیشنل پارٹی ءِ سروک نسیر اھمد، بی ایس او پجار ءِ سرکماش ڈاکٹر تارک بلوچ، چہ ھزارہ ٹک ءَ زامن چنگیزھی ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ سرکماش ماما کدیر ءَ گوں مردماں تران کنان ءَ بژن درشان کرتگ ءُ گوشتگ کہ بلوچستان ءِ جاور چہ گھتری ءَ ابید روچ پہ روچ گنتر بوان اَنت۔ ایمنی ھچ جاہ ءَ گندگ نہ بیت بلکیں مکران، جھالاوان ءُ بولان ءَ گیشتر لشکرکشی ءِ گمان اِنت۔
آئی ءَ گوشتگ کہ بلوچستان ءَ مدام سیاسی چست ءُ ایر بیتگ اَنت، بزانکہ زوراکیانی میان ءَ بلوچ سیاسی کارکناں توار چست کرتگ۔ بلے مرچی سیاسی، چاگردی ءُ دودمانی کِردانی سر ءَ بے جاریں پابندی جنگ بیتگ۔ انسانی ھکانی کارکنانی کھول نشانگ کنگ بوگ ءَ اَنت۔ ڈاکٹر سبیہ بلوچ ءُ بیبو بلوچ ءِ پت درکانودی دزگیر کنگ بیتگ اَنت، کہ اے ریاستی زوراکیاں پدر کنت۔
ماما کدیر گوشتگ کہ سیاسی کرد ریاست ءِ بگیری ءَ نہ اَنت بلکیں سرکاراں آیانی راھبند ءُ دودمانی زمہ واریانی ترانگ ءَ گیج اَنت۔ بلے ریاستی ادارہ ھمے کردانی دارگ ءُ بلوچ راج ءَ گر ءُ دار کنگ ءَ اِنت اے انسانی ھکانی گنتریں لگتمالی اِنت۔ وی بی ایم پی لوٹ کنت کہ زوریں بیگواھیانی درچ زوت بند کنگ ءُ درسیں زور بیگواھیں مردم آجو کنگ بہ بنت۔
ماما کدیر بلوچستان ءَ گیش بیوکیں ناشرکاری ءُ چہ پسنی ءَ کشگ بیتگیں کودکیں زھگ ساھل گلاب ءِ ویل ءِ سر ءَ بژن درشان کرتگ ءُ گوشتگ کہ اے ویل میابارانی لگوری ءِ آسر اِنت ءُ انتزامیہ زھرشانی کنگ ءَ ابید پسنی ءِ وڑیں کسانیں شھرے ءَ ھم انساپ دیگ ءَ بے سوب بیتگ۔
