بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ بی وائی سی ءِ بنجاھی سروکانی دزگیری ءُ گل ءِ سر ءَ ریاستی زوراکی انگت ءَ برجاہ اَنت۔ پد ءَ ھم چہ ریاستی درسیں زوراکیاں ابید بی وائی سی ءِ سروک ءُ کارکن وتی لیکھی راھبند، لیکہ ءُ پہ راجی مول ءَ تچک ءَ اوشتاتگ اَنت۔ گوستگیں بیست روچ اِنت کہ سرجمیں بلوچ راج زھرشانی کنگ ءَ اِنت۔ اے گرانیں ساھت ءُ ناگیگیں جاورانی تہ ءَ بلوچ راج ءَ ھم سنتی ءُ یکجاھی ءِ یک جوانیں درورے برجاہ داشتگ ءُ سکا جوانیں وڑے ءَ ریاستی زوراکیانی بگیری ءَ گھگیری برجاہ داشتگ۔
آئی ءَ گوشتگ کہ بنجاھی سروکانی دزگیری ءِ بگیری ءَ 13 اپریل ءَ یک شمبے ءِ روچ ءَ سرجمیں بلوچستان ءَ زھرشانی کن ایں ءُ زھرشانی ءَ نند ایں۔ درسیں ھنکین اے بابت ءَ شریں وڑے ءَ تیاری بہ کن اَنت ءُ گھگیری ءَ جوانین وڑے ءَ برجاہ بدار اَنت۔
آئی ءَ گوشتگ کہ بلوچ یکجھتی کمیٹی ریاست ءَ تچک ءَ گوش ایت کہ ریاستی ناشرکاری ءُ رستری بی وائی سی ءِ سروک ءُ کارکناں داشت نہ کنت۔ ما گوں لس مردمانی گھگیری ءِ پارست ءَ اے زوراکیانی دیم پہ دیمی ءَ کن ایں ءُ مئے ایمان اِنت کہ ما اے زوراکی ءَ گوں لس مردمانی توان ءَ پروش دے ایں۔
