شال: پاکستانی لشکر ءِ دست ءَ زوربیگواہ کنگ بوتگیں زھیر اھمد ءِ لوگبانُک ءَ وتی شنگ کرتگیں درشانے ءَ گوشتگ کہ منی لوگواجہ زھیر اھمد پاکستانی لشکر ءَ 27 جون 2024 ءَ زوربیگواہ کرتگ۔
آئی گوشتگ کہ پہ زھیر ءِ زوربیگواھی ءِ بگیری ءَ ما پُر ایمنیں زھرشانی کرتگ ءُ روانک کش اِتگ کہ آ نندانک ءُ روانکاں ڈاکٹر ماہ رنگ بلوچ، بیبگر بلوچ، بیبو بلوچ ءُ شاہ جی سبگت اللہ بلوچ ءَ ھوار بی وائی سی ءِ آدگہ کارکناں ءُ بلوچ راج مئے گون ءَ ھم کوپگ بوتگ ءُ مئے ھمراھداری اِش کرتگ۔
آئی گوشتگ کہ من گوں دمگی ءُ جھانی انسانی ھکانی گل ءُ بلوچ راج ءَ لوٹ کن آں کہ آ پہ ڈاکٹر ماہ رنگ بلوچ ءُ آئی ھمراھانی زوتیں آجوئی ءَ وتی کرد ءَ پیلو بہ کن اَنت ءُ منی زوربیگواھیں لوگواجہ زھیر اھمد ءَ ھوار پہ درسیں زوربیگواھیں مردمانی آجوئی ءَ گامگیج بہ زور اَنت۔ مئے جھد پُرایمن ءُ پہ انسان ءِ بنیادی ھک ءَ اِنت ءُ ما انساپ ءِ چمدار ایں۔
