شال: وائس پار بلوچ مسنگ پرسنز ( وی بی ایم پی ) ءَ ماں رسانکدر ءَ وتی شنگ کرتگیں درشانے ءَ گوشتگ کہ زوربیگواھیں زھیر بلوچ ءِ کھول ءَ گوں وی بی ایم پی ءِ سرکماش نسرالله بلوچ ءَ گند ءُ نند کرتگ ءُ گوشتگ که زھیر بلوچ ءَ مچی سزا ءِ بنیاد ءَ آزار دیگ بوگ ءَ اِنت۔
آئی ءَ گوشتگ کہ زهیر بلوچ ھچ وڑیں درکانودی کاراں ھوار نه بیتگ آ یک سرکاری نوکرے بیتگ که ھر روچ وتی کارگس ءَ شتگ، آ گوستگیں سال ءَ 27 جون ءَ ھما وهد ءَ که چه گارکس ءَ وتی گس ءَ روگ ءَ بیتگ سی ٹی ڈی ءُ آدگه ریاستی ادارھانی کارمنداں چه ایری گیشن ، سریاب دگ ءَ درکانودی آوار جتگ ءُ بیگواه کرتگ.
کھول ءَ گوشتگ که ما آئی ءِ زوربیگواھی ءِ بگیری ءَ ایمنیں زھرشانی ھم کرتگ، آئی ءَ ڈیھ ءِ رھبندانی پارست ءَ انساپ دیگ ءِ اوست ءَ پہ زور بیگواھیں مردماں جوڑ بوتگیں کمیشن ءَ پیش بوتگ این ءُ باز رند ءَ گوں ھندی انتزامیه ءَ ھم گند ءُ نند کرتگ بلے آئی بابت ءَ مارا انگت ءَ ھچ گوشگ ءَ نہ اَنت، چه ایشی ءَ کھول سکا آزارانی دیمپان اِنت.
نسرالله بلوچ ءَ زھیر بلوچ ءِ کھول دلجمی داتگ که گل ءِ نیمگ ءَ په آئی ءِ یل کنگ ءَ ھمک جاہ ءَ توار چست کن ایں۔
آئی ءَ گوشتگ که مچی سزا ءِ بنیاد ءَ چونیں کھولے ءِ آزار دیگ ڈیھ ءِ کانود ءُ رھبند ءُ انسانی ھکانی بگیری اِنت ءُ چه اے وڑیں در کانودی کاراں سرجمیں بلوچستان پھریز نه اِنت ءُ چه ایشی ءِ سوب ءَ بلوچستان ءِ جاور روچ په روچ گنتر بوگ ءَ اَنت۔
آئی ءَ گوشتگ که پمشکا سرکار ءُ ڈیھ ءِ ادارهانی سروکاں لوٹ ایت کہ آ بلوچستان ء بابت ءَ شریں وڑے ءَ پیسله به کن اَنت ، بلوچستان ءِ مردمانی جیڑھانی بابت ءَ ڈیھ ءِ رھبندانی بنیاد ءَ کار کنگ به بیت ءُ چه درکانودی کاراں پھریز کنگ به بیت۔ زھیر بلوچ ءَ ھوار پہ درسیں زوربیگواھیں مردمانی زوتیں یل کنگ ءَ دلجمی دیگ به بیت. کجام بیگواھیں مردم ءِ سر ءَ چونیں بھتامے ھست گڑا آمیدگس ءَ پیش کنگ ءُ وتی بے میار پیش کنگ ءِ موہ دیگ بہ بیت۔ اگاں کجام ریاست ءِ میاربار اِنت گڑا دروگیں میڑاں کشگ مه بنت بلکیں آمیدگس ءِ پارست ءَ سزا دیگ به بنت.
