بلوچ وومن پورم ءِ بنجاھی جارکش ءَ وتی درشانے ءَ بلوچستان ءَ انوگیں روچاں بلوچ یکجھتی کمیٹی ءِ بگیری ءَ ارش ءُ زوریں بیگواھیانی سر ءَ بژن درشان کرتگ ءُ گوشتگ کہ انسانی ھکانی لگتمال کنگ ریاست ءِ نیمگ ءَ بے آسریں دودے بیتگ۔
آئی ءَ گوشتگ کہ بی وائی سی ءِ پر ایمنیں سیاسی کارکن ءُ سروکانی درکانودی دزگیری یک دودے جوڑ بیتگ۔ بی وائی سی ءِ بگیری ءَ انوگیں ارش۔ چہ ایشی ءَ ڈاکٹر ماہ رنگ بلوچ، بیبرگ بلوچ، سبگت اللہ شاہ جی، سمی دین، لالا وھاب بلوچ ءُ نوں گلزادی ءِ آوار جنگ جاوراں ناگیگ کنگ ءَ اِنت۔ آیانی سر ءَ ایم پی او ءِ وڑیں کانودءِ رد ءَ ارزی نبیسگ بیتگ کہ اے کانود ءِ بگیری اِنت۔ ما ھمے لوٹ ءَ کن ایں کہ بی وائی سی ءِ درسیں کارکن زوت یل کنگ بہ بنت ءُ ارش بند کنگ بہ بیت۔
جارکش ءَ گوشتگ کہ بلوچستان ءَ زوریں بیگواھی ھمک روچی کارے۔ انوگیں روچاں نبیل نود23 مارچ ءَ گوادر ءُ 7 اپریل ءَ استاد نزام هسن ءِ شال ءَ آوار جنگ بژن اِنت۔ ما انساپ، ساپ ءُ کانود ءِ رد ءَ کاروائی کنگ ءِ لوٹ ءَ کن ایں کہ زوریں بیگواھی درکانودی کارے زوت بند کنگ بہ بیت۔
آئی ءَ گوشتگ کہ آوار جنگ ءَِ پد دروگیں میڑاں کوش ریاست ءِ شونداتانی بھرے جوڑ بیتگ۔ مارچ ءُ اپریل ءَ چہ آواران مشکے ءَ دوازدہ بیگواھیں مردم دروگیں میڑاں کشگ بیتگ اَنت۔ 7 اپریل ءَ پنجگور ءِ ھند وشبود ءَ بھادر شپی نامیں ورنایے کشگ بیتگ۔ ما دروگیں میڑ ءُ درکانودی کوش ءِ ھلاس کنگ ءِ لوٹ ءَ کن ایں۔
جارکش ءَ گوشتگ کہ ریاستی ادارہ پر ایمنیں زھرشانی کنوکانی سر ءَ تیرگواری کنگ ءَ اِنت۔ 7 اپریل ءَ وڈ، ھزدار ءَ زھرشانی ءِ میانءَ یک مردمے کشگ ءُ سے ٹپی بیتگ۔ گوں شال ءِ زھرشانی نندانک ءَ ھمے وڑ کنگ بیتگ۔ اود ءَ پر ایمن ءُ سیاسی کارکن انگر کنگ ءُ آزار دیگ ءُ نشانگ کنگ بیتگ اَنت۔ ما ھمے لوٹءَ کن ایں کہ زھرشانیانی سر ءَ تیرگواریانی درچ بند کنگ ءُ لس مردمانی توار گوش دارگ بہ بیت۔
