اسلام آباد پریس کلب ءِ دیم ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ ڈاکٹر ماہ رنگ پریس کانپریس کرتگ ءُ گوشتگ کہ گوستگیں چل ءُ ھشت روچ اِنت مئے زھرشانی برجاہ اِنت۔ پنچ سد کھول، نودربر، سیاسی ءُ رسانکدری کارکنانی ھواری ءَ نشتگین ءُ چہ مردمی ھکانی ادارھاں لوٹ کنگ ءَ ایں کہ آ مئے زھرشانی نندانک ءَ بیا اَنت ءُ نشتگیں کھولانی نادراھی ءِ جاوراں پچار اَنت ءُ آیانی درداں یاداشت بہ کن اَنت ءُ جھان ءَ پیش بدار اَنت۔
آئی ءَ گوشتگ کہ یک نیمگے ءَ زو بیگواھیں مردمانی کھول پہ وتی آزیزانی آجوئی ءَ زھرشانی ءَ نشتگ اَنت ءُ دومی نیمگ ءَ بلوچستان ءَ آدگہ مردمانی زوریں بیگواھی برجاہ اِنت۔
ڈاکٹر ماہ رنگ ءَ گوشتگ کہ کیچ ءِ ھند دازن تمپ ءَ گوستگیں روچ ءَ ھسن آسپ ءُ جاسم مھمد بکش زور بیگواہ کنگ بوتگ اَنت۔ اے میان ءَ چہ بلوچستان ءَ چل ءَ گیش مردم بیگواہ کنگ بوتگ۔ زور بیگواھیں مردمانی کھولانی گون ءَ ھمدردی درشان کنگ ءَ سیاسی کارکنانی بگیری ءَ ایپ آئی آر نبیسگ بوتگ۔ مرچی تونسہ ءَ مھمد اسلم بزدار ءُ رسول بکش ءِ ھواری ءَ چل ءَ گیش مردم بیگواہ کنگ بوتگ۔
آئی ءَ گوشتگ کہ منزور پشتین پہ بلوچ یکجھتی کیمٹی ءِ زھرشانی نندانک ءَ ھمدردی درشان کنگ ءَ آھگ ءِ بگیری ءَ دزگیر ءُ بندیگ کنگ بوتگ۔
ڈاکٹر ماہ رنگ ءَ گوشتگ کہ اے نندانک ءِ دیم ءَ چہ بلوچستان ءَ کشندہ ٹولی لوٹائینگ ءُ نندارینگ بوتگ اَنت۔چہ ایشاں زھرشانی کنوکاں ھوار پہ اسلام آباد ءِ نشتگیں مردمانی زندگی ءَ ترس اِنت۔
آئی ءَ گوشتگ کہ اے ھما مردم اَنت آیاں ھزدار ءَ سدانی کچ ءَ مردم کشتگ ءُ مچی مانشجاھے ءَ کل کرتگ اَنت ءُ اے مردم توگیں بلوچستان ءَ مردماں کشگ ءَ اَنت۔
ڈاکٹر ماہ رنگ گوشتگ کہ مئے زھرشانی پر ایمن اِنت ءُ پہ مردمی ھکانی پھازداری ءَ برجاہ اِنت۔ جھان ءِ درسیں مردمی ھکانی کارکن، اھوالکار ءُ پٹ ءُ پول کار بیا اَنت ءُ جست بہ کن اَنت۔ میان استمان پہ ھمدردی کنگ ءَ دلگوش ءَ گور بہ کنت۔
آئی ءَ گوشتگ کہ ریاست ءِ سنگینی ھمے گپ ءَ گندگ بیت چل ءُ ھشت روچ ءَ زھرشانی ءَ نندگ ءَ ابید ھچ وڑیں ریاستی جھگیرے پہ گپ ءُ تران ءَ نہ یتکگ۔
