بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بگیریانی بنیاد ءَ پاکستان ریاست بلوچ کارکنانی کھولاں نشانگ کنگ ءَ اِنت۔
آئی ءَ گوشتگ کہ اے دگہ یک ترسناک ءُ زوراکیں گامگیجے کہ پاکستان ریاست ءَبلوچ ءِ نامداریں کارکن سبیہ بلوچ ءِ پت دزگیر کرتگ۔ دگہ میارنیست بلکیں پہ ھمے بیرگیری ءَ برگ بیتگ کہ آ یکشل ءَ بلوچستان ءِ راستیاں پاشک کنگ ءَ اِنت۔
ڈاکٹر نسیم بلوچ ءَ گوشتگ کہ اے دزگیری جتائیں ویلے نہ اِنت بلکیں مچی سزا ءِ ھمے مھکمیں شونداتانی بھر اِنت کہ بلوچستان ءَ دودے جوڑ بیتگ۔ ھما کارکن کہ زوریں بیگواھی، درکانودی کوش، لشکری زوراکی ءُ انسانی ھکانی پادمالیانی بگیری ءَ توار چست کنت گڑا نہ تیوک ءَ آ بلکیں آئی کھول ءُ سرجمیں آبادی بیھار ءُ زوراکیانی آماچ کنگ بنت۔
آئی ءَ گوشتگ کہ چہ ھمے ناشریں ھیلھاں ریاست وتی زھراں ڈاکٹر سبیہ بلوچ ءِ پت ءِ سر ءَ شانگ ءَ اِنت۔ ھمے اوست ءَ کہ آئی ءَ بے توار بہ کنت ءُپہ جزباتی بلیک میل کنگ بہ بیت۔
ڈاکٹر نسیم بلوچ ءَ گوشتگ کہ پاکستان بلوچستان ءَ نوک آبادکار اِنت، گھگیری ءِ ھیال ھم سزا ءِ کابل اِنت ءُ میارباری یے بیتگ، نہ تھنا گھگیری کنوک بلکیں آئی نزیکیں مردم ھم سزا دیگ بنت۔
بی این ایم ءِ سرکماش ءَ گوشتگ کہ اے کارپد درسیں میان استمانی انسانی ھکانی راھبندانی بگیری اِنت۔ چونیں ھم مردمے ءِ ایمنیں زھرشانی یا پرکاریانی جاہ ءَ کھول ءِ زوریں دزگیری ناشریں ریاستانی پجار اِنت۔
ڈاکٹر نسیم بلوچ ءَ گوشتگ کہ اے وھد ءَ مارا گوں یکے دومی ءَ اوشتگ لوٹ ایت۔ اے جھد ھما درسانی اِنت کہ بے ترس ءَ انساپ، آجوئی ءُ تچکیں گپ جنگ لوٹ اَنت۔
