آواران: مشکے ءَ زورگریں پاکستانی لشکر ءَ دگہ سے زور بیگواھیں ورنایانی تیر سپتگیں لاش چگل داتگ اَنت۔
زرمبش اھوالکار ءِ رد ءَ کشگ بیتگیں ورنایانی نام زھور ء ھزور، شاھنواز ء جلال ءُ ھبیب ء ھدو اِنت ۔ زھور ءُ شاھنواز مشکے شردوئی ءِ جاہ منند اَنت ءُ ھیب تراتدان ءِ جاہ منند اِنت۔ ھبیب ءَ بیست روچ پیش پاکستانی لشکر ءَ چہ گس ءَ آوار جتگ ءُ برتگ، زھور ءُ شاھنواز دوشی آوار جنگ بیتگ اَنت۔ اے سے ئیں ورنایانی لاش مرچی شردوئی ءَ دست کپتگ اَنت۔
چوش کہ چہ ایشی ءَ پیش مارچ 2025 ءَ پاکستانی لشکر ءَ چہ مشکے ءَ دگہ ھشت زور بیگواھیں ورنا کشتگ اَت آیانی نام زھیر نیاز ء نیاز مھمد، ارشاد واھد ء ابدُلواھد، سیپ ء ابدُلتیپ ، توسیپ ء ازیم، کامران ء مھمدآلم، مھراج ء نیاز مھمد، مومن ء اسلم ءُ ھپیز اِنت۔ اے ھشتیں ورنا گوستگیں ماہ ءَ جتائیں وھداں کشگ بیتگ اَنت۔
ھندی بنشون ءِ رد ءَ گوستگیں یک ماھے ءِ میان ءَ زورگریں پاکستانی لشکر ءَ تیوک ءَ چہ مشکے ءَ یازدہ زور بیگواھیں ورنا دروگیں میڑاں کشتگ ءُ آیانی ژانگولیں لاش چگل داتگ اَنت۔
