اکتر مینگل ءِ روانک ءِ لوٹ پہ ھک اِنت، سیاسی بندیگ زوت یل کنگ بہ بنت۔ ماما کدیر بلوچشال: پہ زور بیگواھیں مردمانی پدجنگ ءَ وی بی ایم پی ءِ شدکشیں زھرشانی گدان ءَ 5782 روچ سرجم بیتگ۔ آدینگ ءِ روچ ءَ بلوچستان نیشنل پارٹی ءِ سروک منزور رئیس ءُ چاگردی کارکن کمبر بلوچ پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ زوریں بیگواھی ءِ یک نوکیں درچے ودی بیتگ پد ءَ سیاسی ءُ چاگردی مردم نشانگ کنگ بوگ ءَ اَنت۔ آئید ءِ روچ ءَ وی بی ایم پی ءِ زھرشانی ءَ بھر زرتگیں کلانھیں سیاسی کارکن زھیر بلوچ 16 ایم پی او ءِ رد ءَ دزگیر کنگ بیتگ۔ آ یک پیرمرد ءُ دیریگیں سیاسی کارکنے، آ چہ نادراھی ءِ سوب ءَ زوت یل کنگ بہ بیت۔ من ھمے لوٹ ءَ کن آں کہ گوں آئی ءَ نرمی کنگ ءُ شکی ئیں کانود ءِ رد ءَ بند کنگ ءَ ابید آمیدگس ءِ پارست ءَ کیس کنگ بہ بیت۔
آئی ءَ گوشتگ کہ بلوچستان ءَ انسانی ھکانی ناھکیں لگتمالی برجاہ اِنت، ایشی آسر ءَ سیاسی ءُ چاگردی کارکنانی تکانسری گیش بوگ ءَ اَنت۔ اکتر مینگلءِ روانک ءِ لوٹ پہ ھک اَنت، آ منگ بہ بنت ءُ سیاسی بندیگ زوت یل کنگ بہ بنت ءُ آیاں گوں ایمنی ءَ شال ءَ زھرشانی کنگ ءِ ھک دیگ بہ بیت۔
